ബിജു മേനോൻ നായകനായി റിലീസിന് തയ്യാറെടുക്കുന്ന ഏറ്റവും പുതിയ ചിത്രമാണ് ‘തുണ്ട്’. ബിജു മേനോൻ വീണ്ടും പോലീസ് വേഷത്തിലെത്തുന്ന ചിത്രം നവാഗതനായ റിയാസ് ഷെരീഫാണ് സംവിധാനം ചെയ്യുന്നത്. യുവതാരങ്ങൾ അണിനിരക്കുന്ന ചിത്രത്തിന്റെ ഏറ്റവും പുതിയ അപ്‌ഡേറ്റ് പുറത്തുവന്നിരിക്കുകയാണ്. ഒപ്പം ചിത്രത്തിന്റെ പുതിയ പോസ്റ്ററും പങ്കുവച്ചിരിക്കുകയാണ് അണിയറ പ്രവർത്തകർ.
View this post on Instagram
ചിത്രത്തിന്റെ ട്രെയിലർ 25 ന് റിലീസ് ചെയ്യുമെന്ന വാർത്തയാണ് പുറത്തുവിട്ടിരിക്കുന്നത്. ചിത്രത്തിൽ കോൺസ്റ്റബിളിന്റെ വേഷത്തിലാണ് ബിജു മേനോൻ അഭിനയിക്കുന്നത്. പോലീസ് ഉദ്യോഗസ്ഥർക്കായുള്ള ഒരു പൊതുപരീക്ഷ നടക്കുന്നതിനിടെയുള്ള ചിത്രമാണ് പോസ്റ്ററിലുള്ളത്. സംവിധായകൻ റിയാസ് ഷെരീഫ് തന്നെയാണ് ചിത്രത്തിന്റെ തിരക്കഥ ഒരുക്കുന്നത്. തല്ലുമാല എന്ന ചിത്രത്തിന്റെ നിർമ്മാതാക്കളായ ആഷിഖ് ഉസ്മാൻ പ്രൊഡക്ഷൻസാണ് ചിത്രം നിർമ്മിക്കുന്നത്.
അയ്യപ്പനും കോശിയും എന്ന ചിത്രത്തിന് ശേഷം ബിജു മേനോൻ വീണ്ടും ശക്തമായ ഒരു പോലീസ് വേഷത്തിൽ എത്തുന്നു എന്ന പ്രത്യേകതയും സിനിമയ്‌ക്കുണ്ട്. ചിത്രത്തിന്റെ നേരത്തേ പുറത്തുവന്ന പോസ്റ്ററുകളും ഗാനങ്ങളും ഇതിനോടകം ശ്രദ്ധേയമായിരുന്നു. ഫെബ്രുവരി 16 ന് തുണ്ട് തീയേറ്ററുകകളിലെത്തും. ഇതിനോടകം ചിത്രീകരണം പൂർത്തിയായ സിനിമയുടെ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണ്.
ഷൈൻ ടോം ചാക്കോ, ഉണ്ണിമായ, അഭിരാം തട്ടത്തിൽ, എം.എസ് ഗോകുലൻ, ഷാജു ശ്രീധരൻ, ധർമജൻ, അൽത്താഫ് സലിം തുടങ്ങിയവരാണ് ചിത്രത്തിലെ മറ്റ് കഥാപാത്രങ്ങൾ. ജിംഷി ഖാലിദാണ് ചിത്രത്തിന്റെ ക്യാമറ കൈകാര്യം ചെയ്യുന്നത്. വിനായക് ശശികുമാർ ഗാനരചന, ഗോപി സുന്ദറാണ് സംഗീത സംവിധാനം നിർവ്വഹിക്കുന്നത്.
