കോട്ടയം: നിരവധി ക്രിമിനൽ കേസുകളിൽ പ്രതിയായ യുവാക്കളെ കാപ്പ ചുമത്തി ജില്ലയിൽ നിന്നും പുറത്താക്കി. ആർപ്പൂക്കര സ്വദേശികളായ ടോണി തോമസ്, റൊണാൾഡോ എന്നീ യുവാക്കളെയാണ് നാടുകടത്തിയത്. ടോണി തോമസിനെ ഒരു വർഷത്തേക്കും റൊണാൾഡോയെ ആറുമാസത്തേക്കുമാണ് ജില്ലാ പൊലീസ് മേധാവി കെ. കാർത്തിക്കിന്റെ റിപ്പോർട്ടിന്റെ അടിസ്ഥാനത്തിൽ നാടുകടത്തിയത്.
കൊലപാതക ശ്രമം, ലഹരി വസ്തുക്കളുടെ വിൽപ്പന തുടങ്ങിയവയുമായി ബന്ധപ്പെട്ട് നിരവധി കേസുകളിലെ പ്രതികളാണ് യുവാക്കൾ. ടോണി തോമസിന്റെ പേരിൽ ഗാന്ധി നഗർ, കോട്ടയം വെസ്റ്റ്, അയർകുന്നം, എറണാകുളം ഇൻഫോ പാർക്ക് തുടങ്ങിയ സ്റ്റേഷനുകളിൽ കൊലപാതക ശ്രമം, മോഷണം, ലഹരി വസ്തുക്കളുടെ വിൽപ്പന തുടങ്ങി നിരവധി കേസുകളാണുള്ളത്. രണ്ടാമത്തെ പ്രതിയായ റൊഡാൾഡോയ്‌ക്കെതിരെയും സമാനമായ കേസുകൾ ഗാന്ധിനഗർ, കോട്ടയം വെസ്റ്റ്, ഏറ്റുമാനൂർ തുടങ്ങിയ സ്റ്റേഷനുകളിൽ രജിസ്റ്റർ ചെയ്തിട്ടുണ്ട്.
