ബോളിവുഡിൽ കഴിഞ്ഞ വർഷം ഏറെ തരംഗം സൃഷ്ടിച്ച ചിത്രമായിരുന്നു അനിമൽ. ത്രില്ലർ ഗണത്തിൽപ്പെട്ട ചിത്രം രൺബീർ കപൂറിന്റെ കരിയറിലെ വൻമുതൽ മുടക്കിൽ എത്തിയ ചിത്രം കൂടിയായിരുന്നു. രണ്ട് ദിവസം മുൻപായിരുന്നു ചിത്രം ഒടിടിയിൽ എത്തിയത്. ഒടിടിയിലും മികച്ച പ്രതികരണം നേടുകയാണ് ചിത്രം. സന്ദീപ് റെഡ്ഡി വംഗ സംവിധാനം ചെയ്യുന്ന ചിത്രം അച്ഛൻ-മകൻ ബന്ധത്തിന്റെ കഥകൂടായാണ് പറയുന്നത്. ചിത്രത്തിൽ രൺബീറിന്റെ പിതാവായി എത്തുന്നത് അനിൽ കപൂർ ആണ്.
#Animal papa count. pic.twitter.com/ltaaIJzK1l
— LetsCinema (@letscinema) January 27, 2024
ഇപ്പോഴിതാ കൗതുകകരമായ ഒരു വീഡിയോ സോഷ്യൽ മീഡിയയിൽ ശ്രദ്ധ നേടുകയാണ്. അനിമലിൽ ‘പാപ്പാ’ എന്ന വിളി എത്രപ്രാവശ്യം ഉണ്ടെന്നതാണ് കാണിക്കുന്നത്. ചിത്രത്തിന്റെ തുടക്കം മുതൽ ഒടുക്കം വരെ എത്രപ്രാവശ്യം പാപ്പാ എന്ന് വിളിക്കുന്നുണ്ടെന്നും വീഡിയോയിൽ കാണിക്കുന്നുണ്ട്. പത്തോ അമ്പതോ നൂറോ അല്ല, 196 തവണയാണ് ചിത്രത്തിൽ പാപ്പാ എന്ന് വിളിക്കുന്നത്. വൻവിജയമായിരുന്ന ചിത്രത്തെക്കുറിച്ചുള്ള ഈ വീഡിയോയും സോഷ്യൽ മീഡിയ പ്ലാറ്റ്‌ഫോമുകളിൽ ഇപ്പോൾ വൈറലാണ്.
ബോബി ഡിയോൾ, രശ്മിക മന്ദാന, തൃപ്തി ദിമ്രി തുടങ്ങിയവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്. അമിത് റോയ് ഛായാഗ്രഹണം നിർവ്വഹിച്ചിരിക്കുന്ന ചിത്രത്തിന്റെ എഡിറ്റിംഗും സന്ദീപ് റെഡ്ഡി വാംഗ തന്നെയാണ്. ടി സിരീസ് ഫിലിംസ്, ഭദ്രകാളി പിക്‌ചേഴ്‌സ്, സിനി 1 സ്റ്റുഡിയോസ് എന്നീ ബാനറുകൾ ചേർന്നാണ് ചിത്രം നിർമ്മിച്ചിരിക്കുന്നത്.
