ലക്നൗ ; വരുന്ന ഏപ്രിൽ 17 ന് മുൻപ് അയോദ്ധ്യ രാമക്ഷേത്രത്തിന്റെ ഗോപുര നിർമ്മാണം പൂർത്തിയാക്കാൻ തീരുമാനം . ഏപ്രിൽ 17 നാണ് രാമനവമി . ശ്രീരാമൻ ജനിച്ച രാമനവമി ദിനം സൂര്യരശ്മികൾ വിഗ്രഹത്തിന്റെ നെറ്റിത്തടത്തിൽ വീഴും വിധമാണ് ഗർഭഗൃഹം ഒരുക്കിയിരിക്കുന്നത് . ഇതിനായി ഗോപുര നിർമ്മാണം കൂടി പൂർത്തിയാക്കേണ്ടതുണ്ട് .
രാമനവമി ദിനം സൂര്യരശ്മികൾ വിഗ്രഹത്തിന്റെ നെറ്റിത്തടത്തിൽ പതിക്കുന്നത് 3 മിനിറ്റ് നീണ്ടുനിൽക്കും. ഇതിനായി ക്ഷേത്ര ശിഖരം മുതൽ ശ്രീകോവിൽ വരെ ഉപകരണങ്ങൾ ഒരുക്കിയിട്ടുണ്ട്. ഉപകരണങ്ങളുടെ ഒരു ഭാഗം ശ്രീകോവിലിൽ സ്ഥാപിച്ചിട്ടുണ്ട്. ഓരോ 19 വർഷത്തിലും സൗര, ചാന്ദ്ര മാസങ്ങളുടെ തീയതികൾ ഒരേ തീയതിയിൽ വരുന്നു. ഇത് വച്ചാണ് രാം ലല്ലയ്‌ക്കായി ഒരു ടിൽറ്റ് മെക്കാനിസം വികസിപ്പിച്ചെടുത്തിരിക്കുന്നത് . ഇതിൽ കണ്ണാടിയും ലെൻസും പെരിസ്കോപ്പിക്കായി ഘടിപ്പിച്ചിരിക്കുന്നു.- സെൻട്രൽ ബിൽഡിംഗ് റിസർച്ച് ഇൻസ്റ്റിറ്റ്യൂട്ടിലെ (സിബിആർഐ) ചീഫ് സയൻ്റിസ്റ്റ് എസ് കെ പാനിഗ്രഹി പറഞ്ഞു.
സൂര്യരശ്മികൾ പതിക്കുന്ന ക്ഷേത്രത്തിന്റെ മുകളിലെ കണ്ണാടി രാമനവമി ദിനത്തിൽ കിരണങ്ങൾ പ്രതിഫലിക്കുന്ന തരത്തിൽ കറങ്ങി ശ്രീരാമന്റെ ശിരസ്സിൽ എത്തും. ഇതിനായി ഉപകരണങ്ങൾ സ്ഥാപിക്കാൻ കഴിയുന്ന തരത്തിൽ മൂന്നാം നില വരെയുള്ള ശ്രീകോവിലിന്റെ മുകൾ ഭാഗം വേഗത്തിൽ പൂർത്തിയാക്കേണ്ടത് ആവശ്യമാണ്. രാമക്ഷേത്രത്തിന് സമാനമായ സൂര്യതിലക് സംവിധാനം ചില ജൈന ക്ഷേത്രങ്ങളിലും കൊണാർക്കിലെ സൂര്യ ക്ഷേത്രത്തിലും ഇതിനകം ഉപയോഗത്തിലുണ്ട്. എന്നാൽ അവർ വ്യത്യസ്ത തരം എഞ്ചിനീയറിംഗ് വിദ്യയാണ് ഉപയോഗിക്കുന്നത് – പാനിഗ്രഹി പറഞ്ഞു.
