മുംബൈ: ഏകീകൃത സിവിൽ കോഡ് ഉടൻ പാസാക്കണമെന്ന് ശിവസേന. ബിൽ പാർലമെൻ്റിന്റെ വരുന്ന ബജറ്റ് സമ്മേളനത്തിൽ തന്നെ പാസാക്കണമെന്നാണ് ഏകനാഥ് ഷിൻഡെയുടെ നേതൃത്വത്തിലുള്ള ശിവസേന ആവശ്യപ്പെട്ടത്. ശിവസേന എംപി രാഹുൽ ഷെവാലെയാണ് ഇക്കാര്യം അറിയിച്ചത്. ഡൽഹിയിൽ നടന്ന വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം.
അയോദ്ധ്യയിൽ രാമക്ഷേത്രം നിർമ്മിച്ചതിന് പ്രധാനമന്ത്രി നരേന്ദ്രമോദിയെ അഭിനന്ദിച്ച് കൊണ്ട് പാർലമെൻ്റിൽ പ്രമേയം പാസാക്കണം. സർക്കാർ അവതരിപ്പിക്കുന്ന എല്ലാ ബില്ലുകളെയും പാർട്ടി പിന്തുണയ്‌ക്കുമെന്നും ഷെവാലെ പറഞ്ഞു.
ജനുവരി 31 നും ഫെബ്രുവരി ഒമ്പതിനും ഇ‌ടയിൽ ന‌ടക്കുന്ന ഒരു ഹ്രസ്വ സമ്മേളനമായിരിക്കും ഇത്തവണത്തെ ബജറ്റ് സമ്മേളനം. ധനമന്ത്രി നിർമ്മല സീതാരാമൻ ലോക്‌സഭാ തിരഞ്ഞെടുപ്പിന് മുന്നോടിയായി ഇടക്കാല ബജറ്റ് അവതരിപ്പിക്കും.
