ഉണ്ണി മുകുന്ദൻ നായകനാകുന്ന ഏറ്റവും പുതിയ ചിത്രമാണ് ജയ് ഗണേഷ്. രഞ്ജിത് ശങ്കർ തിരക്കഥ എഴുതി സംവിധാനം ചെയ്യുന്ന ചിത്രം വിഷു റിലീസിന് തയ്യാറെടുക്കുകയാണ്. ചിത്രത്തിന്റെ തുടക്കം മുതൽ സിനിമക്കെതിരെ കടുത്ത സൈബർ ആക്രമണങ്ങളാണ് നടക്കുന്നത്. ഇപ്പോഴിതാ ഇത്തരം വ്യാജ പ്രചരണങ്ങൾക്കെതിരെ പ്രതികരിച്ചുകൊണ്ട് രംഗത്തെത്തിയിരിക്കുകയാണ് ഉണ്ണി മുകുന്ദൻ. സമൂഹമാദ്ധ്യമങ്ങളിലൂടെയാണ് താരം പ്രതികരിച്ചിരിക്കുന്നത്.
‘റിലീസ് പോലും ചെയ്യാത്ത ഒരു സിനിമയെ താഴ്ത്തിക്കെട്ടാൻ നിങ്ങൾ എത്രത്തോളം പോകും. ഒരു സിനിമയെ കൊല്ലാനുള്ള ശ്രമങ്ങൾ ജനുവരി 1 മുതൽ ആരംഭിച്ചതാണ് ഇപ്പോഴും തുടരുന്നു. ഞാൻ പറയാത്ത വാക്കുകളും പ്രസ്താവനകളും സിനിമയെ തകർക്കാനായി പ്രചരിപ്പിക്കുന്നു. ഞാനോ എന്റെ സിനിമയോ പരാജയപ്പെടുമെന്നത് ഇതിന് പിന്നിൽ പ്രവർത്തിക്കുന്നവരുടെ സ്വപ്നം മാത്രമാണ്.
എനിക്ക് ഈ മസേജ് അയച്ച മാന്യവ്യക്തിയോട് പറഞ്ഞതാണ് ഞാൻ ഇവിടെയും പറഞ്ഞിരിക്കുന്നത്. എന്നെ അറിയുന്നവർ വിവേകത്തോടെ തന്നെ ചിന്തിക്കും. ഇനി സിനിമയിൽ കാണാം! ജയ്ഗണേഷ് ഏപ്രിൽ 11 ന് കേരളത്തിലെ തീയേറ്ററുകളിലെത്തും. യുഎംഎഫ് ആദ്യമായി വിതരണം ചെയ്യുന്ന ചിത്രം കൂടായാണ് ജയ് ഗണേഷ്. ഉണ്ണി മുകുന്ദൻ കുറിച്ചു.
കുറിപ്പിനൊപ്പം വാട്‌സ്ആപ്പ് ചാറ്റിന്റെ സ്‌ക്രീൻഷോട്ടും താരം പങ്കുവച്ചു. ശ്രീരാമ ജ്യോതി തെളിയിക്കാത്തവരും ഉച്ചത്തിൽ ജയ് ശ്രീറാം വിളിക്കാത്തവരും എന്റെ സിനിമ കാണണ്ട എന്ന തരത്തിൽ ഉണ്ണി മുകുന്ദനെയും താരത്തിന്റെ ചിത്രത്തെയും മോശമായി ചിത്രീകരിക്കുന്ന പോസ്റ്ററായിരുന്നു ചാറ്റിൽ ഉണ്ടായിരുന്നത്. നിങ്ങളെപ്പോലെ വിവേകമുള്ള ആളുകൾക്ക് കാര്യങ്ങൾ അറിയാമെന്നായിരുന്നു വാട്‌സ്ആപ്പിൽ താരം നൽകിയ
മറുപടി.
