റാഞ്ചി: സർക്കാർ രൂപീകരിക്കാൻ ഝാർഖണ്ഡ് ഗവർണർ സിപി രാധാകൃഷ്ണൻ ഉടൻ തന്നെ ക്ഷണിക്കുമെന്ന് ഉറപ്പുണ്ടെന്ന് ഝാർഖണ്ഡ് മുക്തി മോർച്ച നിയമസഭാ കക്ഷി നേതാവ് ചംപൈ സോറൻ. ഗവർണർ ക്ഷണിച്ചില്ലെന്ന് വ്യാജപ്രചാരണങ്ങൾക്ക് പിന്നാലെയാണ് ചംപൈ സോറന്റെ വാക്കുകൾ. ഇന്നലെ രാജ്ഭവനിലെത്തിയ ചംപൈ സോറൻ ഗവർണറുമായി കൂടിക്കാഴ്ച നടത്തിയിരുന്നു. തനിക്ക് കോൺഗ്രസ്- ആർജെഡി കക്ഷികളുടെ പിന്തുണയുണ്ടെന്നും അദ്ദേഹം പറഞ്ഞു.
പുതിയ സർക്കാർ രൂപീകരണത്തിനുള്ള നടപടികൾ ഉടൻ ആരംഭിക്കുമെന്ന് ഗവർണർ ഞങ്ങൾക്ക് ഉറപ്പുനൽകിയിട്ടുണ്ട്. നിലവിൽ ഞങ്ങൾ റിപ്പോർട്ട് സമർപ്പിച്ചിട്ടുണ്ട്. 43 എംഎൽഎമാർ ഞങ്ങൾക്ക് പിന്തുണയുണ്ട്. 46-47 വരെ അത് എത്തുമെന്നാണ് പ്രതീക്ഷ. – ചംപൈ സോറൻ പറഞ്ഞു,
ഖനന അഴിമതിയിലൂടെ കള്ളപ്പണം വെളുപ്പിച്ചെന്ന് ആരോപണത്തിൽ ഹേമന്ത് സോറനെ എൻഫോഴ്‌സ്‌മെൻ്റ് ഡയറക്ടറേറ്റ് അറസ്റ്റ് ചെയ്തിരുന്നു. ഇതിന് പിന്നാലെ ഹേമന്ത് സോറൻ മുഖ്യമന്ത്രി സ്ഥാനം രാജിവെച്ചിരുന്നു. നിലവിൽ സംസ്ഥാനത്ത് മുഖ്യമന്ത്രി ഇല്ലാത്ത സ്ഥിതിയാണുള്ളത്.
