ബിജു മേനോൻ നായകനാകുന്ന ഏറ്റവും പുതിയ ചിത്രമാണ് തുണ്ട്. നവാഗതനായ റിയാസ് ഷെരീഫാണ് ചിത്രം സംവിധാനം ചെയ്യുന്നത്. ഫെബ്രുവരി 16 ന് ചിത്രം തീയേറ്ററുകളിലെത്തും. ഏറെ ആവേശത്തോടെയാണ് ചിത്രത്തിന്റെ ഒരോ അപ്‌ഡേറ്റുകളും ആരാധകർ ഏറ്റെടുക്കുന്നത്. ചിത്രത്തിന്റെ ട്രെയിലറും ശ്രദ്ധ നേടിയിരുന്നു. ഇപ്പോഴിതാ ചിത്രത്തിന്റെ ഏറ്റവും പുതിയ പോസ്റ്റർ പങ്കുവച്ചിരിക്കുകയാണ് അണിയറ പ്രവർത്തകർ.
പോലീസ് ഉദ്യോഗസ്ഥർക്കായുള്ള ഒരു പൊതുപരീക്ഷയിൽ പാസാകാനായി ബുദ്ധിമുട്ടുന്ന നായകന്റെ കഥയാണ് ചിത്രത്തിൽ പറയുന്നത്. പരീക്ഷയ്‌ക്ക് മുമ്പായുള്ള തയ്യാറെടുപ്പുകളാണ് ഇപ്പോൾ പുറത്തുവന്ന പോസ്റ്ററിലുള്ളത്. ബിജു മേനോനൊപ്പം യുവതാരങ്ങളും ചിത്രത്തിൽ അണിനിരക്കുന്നുണ്ട്. കോൺസ്റ്റബിളിന്റെ വേഷത്തിലാണ് ബിജു മേനോൻ തുണ്ടിൽ അഭിനയിക്കുന്നത്.
സംവിധായകൻ റിയാസ് ഷെരീഫ് തന്നെയാണ് ചിത്രത്തിന്റെ തിരക്കഥ ഒരുക്കുന്നത്. തല്ലുമാല എന്ന ചിത്രത്തിന്റെ നിർമ്മാതാക്കളായ ആഷിഖ് ഉസ്മാൻ പ്രൊഡക്ഷൻസാണ് ചിത്രം നിർമ്മിക്കുന്നത്. തുണ്ടിന്റെ നേരത്തേ പുറത്തുവന്ന പോസ്റ്ററുകളും ഗാനങ്ങളും ഇതിനോടകം ശ്രദ്ധേയമായിരുന്നു. ചിത്രീകരണം പൂർത്തിയായ സിനിമയുടെ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണ്.
ഷൈൻ ടോം ചാക്കോ, ഉണ്ണിമായ, അഭിരാം തട്ടത്തിൽ, എം.എസ് ഗോകുലൻ, ഷാജു ശ്രീധരൻ, ധർമജൻ, അൽത്താഫ് സലിം തുടങ്ങിയവരാണ് ചിത്രത്തിലെ മറ്റ് കഥാപാത്രങ്ങൾ. ജിംഷി ഖാലിദാണ് ചിത്രത്തിന്റെ ക്യാമറ കൈകാര്യം ചെയ്യുന്നത്. വിനായക് ശശികുമാർ ഗാനരചന, ഗോപി സുന്ദറാണ് സംഗീത സംവിധാനം നിർവ്വഹിക്കുന്നത്.
