തിരുവനന്തപുരം: പുള്ളിപ്പുലിക്ക് പിന്നാലെ പൊന്മുടിയിൽ കാട്ടാനയിറങ്ങി. പൊന്മുടിവളവിൽ വൈകീട്ട് അഞ്ച് മണിയോടെയാണ് രണ്ട് കാട്ടാനകളിറങ്ങിയത്. കാട്ടാനകൾ ഇതുവരെയും കാട് കയറിയിട്ടില്ലെന്നാണ് വിവരം. റോഡിലേക്ക് ഇറങ്ങി വരാതിരിക്കാനായി വനം വകുപ്പ് ഉദ്യോഗസ്ഥരും സ്ഥലത്തെത്തി നിലയുറപ്പിച്ചിട്ടുണ്ട്.
വിനോദസഞ്ചാര കേന്ദ്രമായ പൊന്മുടിയിലേക്കുള്ള ചുരം റോഡിലെ നാലാം വളവിലാണ് രണ്ട് കാട്ടാനകൾ നിലയുറപ്പിച്ചത്. ഇതുവഴി വന്ന സഞ്ചാരിയാണ് സംഭവം വനം വകുപ്പിനെ അറിയിച്ചത്. വനം വകുപ്പെത്തി ആനകളെ കാട്ടിലേക്ക് കയറ്റിവിടാൻ ശ്രമിച്ചെങ്കിലും ആനകൾ കാട്ടിലേക്ക് പോയിട്ടില്ല. വനത്തിനുള്ളിലെ ചൂട് കാരണമാണ് കാട്ടാനകൾ കാട്ടിൽ നിന്നും ഇറങ്ങി വരുന്നതെന്നാണ് വനം വകുപ്പ് ഉദ്യോഗസ്ഥർ പറയുന്നത്. കഴിഞ്ഞ മാസമാണ് പൊന്മുടിയിൽ പുള്ളിപ്പുലി ഇറങ്ങിയത്.
