അമൃത്സർ: അന്താരാഷ്ട്ര അതിർത്തിക്ക് സമീപത്തായി കണ്ടെത്തിയ ഡ്രോൺ പിടിച്ചെടുത്ത് അതിർത്തി സുരക്ഷാ സേന. ചൈനീസ് നിർമ്മിത ഡ്രോണാണ് പിടിച്ചെടുത്തത്. പഞ്ചാബിലെ ഗുരുദാസ്പൂർ ജില്ലയ്‌ക്ക് സമീപം ഇന്ത്യാ- പാകിസ്താൻ അതിർത്തിയിലായാണ് കഴിഞ്ഞ ദിവസം ഡ്രോൺ കണ്ടെത്തിയത്.
കഴിഞ്ഞ ദിവസം രാത്രിയോടെയാണ് അതിർത്തി പ്രദേശത്ത് ഡ്രോണിന്റെ സാന്നിദ്ധ്യം മനസിലാക്കിയത്. തുടർന്ന് സേന ഡ്രോൺ വെടിവെച്ച് വീഴ്‌ത്തുകയുമായിരുന്നു. ശേഷം പരിസരത്ത് നടത്തിയ പരിശോധനയിൽ സമീപത്തെ കൃഷിയിടത്തിൽ നിന്ന് തകർന്ന നിലയിൽ ഡ്രോൺ കണ്ടെത്തുകയായിരുന്നു.
ക്വാഡ് കോപ്റ്റർ ഡ്രോണാണ് കണ്ടെത്തിയതെന്ന് സുരക്ഷാ സേന അറിയിച്ചു. ഇതിലൂടെ നുഴഞ്ഞുകയറ്റക്കാരുടെ ഒരു ശ്രമം കൂടി പരാജയപ്പെടുത്തിയെന്നും അതിർത്തി സുരക്ഷാ സേന പുറത്തുവിട്ട വാർത്താക്കുറിപ്പിൽ അറിയിച്ചു.
