ന്യൂഡൽഹി: ലോക്സഭ തിരഞ്ഞെടുപ്പിൽ വിജയിക്കുമെന്ന ആത്മവിശ്വാസം പ്രകടിപ്പിച്ച് ആഭ്യന്തരമന്ത്രി അമിത് ഷാ. യാതൊരു വിധ സംശയവുമില്ല, നരേന്ദ്ര മോദി അധികാരം നിലനിർത്തുമെന്ന് ജനങ്ങൾ മനസിൽ ഉറപ്പിച്ചിട്ടുണ്ടെന്നും അദ്ദേഹം പറഞ്ഞു. പാർട്ടി ആസ്ഥാനത്ത് നടന്ന കൺവെൻഷനിൽ സംസാരിക്കുകയായിരുന്നു അദ്ദേഹം.
രാജ്യസുരക്ഷയാണ് ബിജെപിക്ക് പ്രധാനം. വസുധൈവ കുടുംബകം എന്ന ആശയമാണ് മോദി നടപ്പിലാക്കുന്നത്. അഴിമതിയും ജാതിവാദവും മോദി ഇല്ലാതാക്കി. കഴിഞ്ഞ പത്ത് വർഷത്തിനിടെ സർവ മേഖലയിലും രാജ്യത്ത് വികസനം നടപ്പിലായെന്നും കേന്ദ്ര ആഭ്യന്തരമന്ത്രി പറഞ്ഞു.
രാജ്യത്തെ ജനാധിപത്യത്തിന്റെ ശോഭയും ചൈതന്യവും തകർക്കുകയാണ് ഇന്ത്യ സഖ്യത്തിന്റെയും കോൺഗ്രസിന്റെയും ലക്ഷ്യമെന്നും അമിത് ഷാ വ്യക്തമാക്കി. അഴിമതിയും സ്വജനപക്ഷപാതവും പ്രീണനവും ജാതീയതയും കൊണ്ടാണ് അവർ രാജ്യത്തിന്റെ ജനാധിപത്യത്തിന് നിറം നൽകിയത്. ഇവയെല്ലാം തകർത്തെറിഞ്ഞാണ് മോദി വികസനം യാഥാർത്ഥ്യമാക്കിയതെന്നും അദ്ദേഹം കൂട്ടിച്ചേർത്തു.
അടിമത്തത്തിന്റെ പ്രതീകങ്ങളിൽ നിന്ന് രാജ്യത്തെ മോചിപ്പിക്കാൻ പ്രധാനമന്ത്രി ആഹ്വാനം ചെയ്തു. സ്വാതന്ത്ര്യത്തിന്റെ രണ്ടാം ദിനം ഇത് ആരംഭിക്കേണ്ടതായിരുന്നു. എന്നാൽ കോൺഗ്രസും ഇന്ത്യ സഖ്യവും അടിമത്തത്തിന്റെ പ്രതീകങ്ങളിൽ നിന്ന് രാജ്യത്തെ മോചിപ്പിക്കുമെന്ന് സങ്കൽപ്പിക്കുക പോലും ചെയ്തിരുന്നില്ല. മൂന്നാം തവണയും നരേന്ദ്ര മോദി അധികാരത്തിലെത്തിയാൽ തീവ്രവാദം, ഭീകരവാദം, നക്‌സലിസം എന്നിവയിൽ നിന്ന് രാജ്യത്തെ സ്വതന്ത്രമാക്കുമെന്നും ജനങ്ങൾക്ക് സമാധാനം പ്രദാനം ചെയ്യുമെന്നും അദ്ദേഹം കൂട്ടിച്ചേർത്തു.
