തൃശൂര്‍: താനൊരു സുരേഷ് ഗോപി ഫാനാണെന്ന് കോണ്‍ഗ്രസ് എംപി ടി.എന്‍. പ്രതാപന്‍. തൃശൂരില്‍ നടത്തിയ വാര്‍ത്താസമ്മേളനത്തിൽ സംസാരിക്കുകയാണ് പ്രതാപൻ.
“ഞാൻ സിനിമാ ആരാധകനാണ്. മമ്മൂട്ടി, മോഹന്‍ലാല്‍ എന്നിവരെ ഇഷ്ടമാണ്. അവരുടെ സിനിമകളെല്ലാം കാണും. മൂന്നാമത് ഞാന്‍ ഇഷ്ടപ്പെടുന്ന നടനാണ് സുരേഷ് ഗോപി. അദ്ദേഹത്തിന്റെ ഏത് പുതിയ സിനിമ വന്നാലും ആദ്യം കാണുന്ന ഒരാളാണ് ഞാന്‍. ഏത് പടമിറങ്ങിയാലും അദ്ദേഹത്തിന്റെ സിനിമയെ ഞാന്‍ പ്രോത്സാഹിപ്പിക്കും. മലയാള സിനിമയില്‍ അദ്ദേഹം ഇനിയും ഉണ്ടാകണം. അതിനുള്ള സൗന്ദര്യവും ആകാരരൂപവും കഴിവും മിടുക്കും സുരേഷ് ഗോപിയ്‌ക്കുണ്ട്. “- പ്രതാപന്‍ പറഞ്ഞു.
പണ്ട് ഞാന്‍ എംഎല്‍എ ആയിരിക്കുമ്പോള്‍ ഒരു പരിപാടിയ്‌ക്കെത്തിയ സുരേഷ് ഗോപി ചെണ്ട വേണമെന്ന് പറഞ്ഞു. അന്ന് കുട്ടന്‍മാരാരെക്കൊണ്ട് വടിവൊത്ത, ഒരു നല്ല ചെണ്ട ഞാന്‍ സംഘടിപ്പിച്ച് കൊടുത്തിരുന്നു. കലാകാരന്മാരെ എനിക്കിഷ്ടമാണ്. കലാകാരനായ സുരേഷ് ഗോപിയെ സ്ക്രീനില്‍ എനിക്ക് ഇഷ്ടമാണ്. – പ്രതാപന്‍ പറഞ്ഞു.
