മലയാളി പ്രേക്ഷകരുടെ മനസുകൾ കീഴടക്കി പ്രേമലു. ഈ മാസം ഒമ്പതിന് തിയേറ്ററിലെത്തിയ ചിത്രത്തിന്റെ ആഗോള ബോക്സോഫീസ് വിവരങ്ങളാണ് ഇപ്പോൾ പുറത്തുവന്നിരിക്കുന്നത്. തിയേറ്ററിലെത്തി വെറും 12 ദിവസങ്ങൾ കൊണ്ട് 50 കോടിയാണ് പ്രേമലു സ്വന്തമാക്കിയിരിക്കുന്നത്.
എല്ലാ പ്രായക്കാർക്കും ആസ്വദിക്കാൻ സാധിക്കുന്ന കോമഡിപടമാണ് പ്രേമലു. ചുരുക്കം ചില സിനിമകളിലൂടെ പ്രേക്ഷകശ്രദ്ധ നേടിയ നസ്‌ലിൻ- മമിത താരങ്ങളുടെ മികച്ച പ്രകടനമാണ് ചിത്രത്തിലുള്ളതെന്നാണ് പ്രേക്ഷകരുടെ അഭിപ്രായം. ഹൈദരാബാദ് നഗരത്തിന്റെ പശ്ചാത്തലത്തിൽ ഒരുക്കിയിരിക്കുന്ന ഒരു മുഴുനീള റൊമാന്റിക്‌ എന്റര്‍ടൈനര്‍ ചിത്രമാണ് പ്രേമലു.
രോമാഞ്ചത്തിന് ശേഷം അടുത്തകാലത്ത് ഇത്രയും ചിരിപ്പിച്ച മറ്റൊരു സിനിമയുണ്ടായിട്ടില്ലെന്നാണ് പ്രേക്ഷകർ പറയുന്നത്. പുതിയ റിലീസുകൾ വരുമ്പോഴും പ്രേക്ഷകർക്കിടയിലെ പ്രേമലുവിന്റെ സ്വീകാര്യത കുറഞ്ഞിട്ടില്ല. ഈ വർഷത്തെ ഹിറ്റ് സിനിമകളിൽ ഒന്നായിരിക്കും പ്രേമലു എന്ന കാര്യത്തിൽ സംശയമില്ലെന്നും വ്യക്തമാണ്.
തണ്ണീർമത്തൻ ദിനങ്ങൾ, സൂപ്പർ ശരണ്യ എന്നീ ഹിറ്റ് ചിത്രങ്ങൾക്ക് ശേഷം ഗിരീഷ് എഡി ഒരുക്കുന്ന ചിത്രമാണിത്. ഗിരീഷ് എഡിയും കിരണ്‍ ജോസിയും ചേര്‍ന്നാണ് ചിത്രത്തിന്റെ തിരക്കഥ ഒരുക്കിയത്. ദിലീഷ് പോത്തൻ, ഫഹദ് ഫാസിൽ, ശ്യാം പുഷ്ക്കരൻ എന്നിവർ ചേര്‍ന്നാണ് ‘പ്രേമലു’ നിര്‍മ്മിച്ചിരിക്കുന്നത്. ചിത്രത്തെ കുടുംബ പ്രേക്ഷകരും യുവാക്കളും ഏറ്റെടുത്തുകഴിഞ്ഞു.
