അനക്കോണ്ട എന്ന് കേൾക്കുമ്പോഴെ നമ്മുടെ ഉള്ളൊന്ന് വിറയ്ക്കും. ലോകത്തിലെ ഏറ്റവും വലിയ പാമ്പാണ് ഇവ. അനകോണ്ട ഫിലിം സീരിസുകളും ആരും മറക്കാൻ സാധ്യതയില്ല. ഒരു പക്ഷെ ഈ പാമ്പുകളെ നേരിട്ട് കണ്ടിട്ടില്ലെങ്കിൽ പോലും അനകോണ്ട സിനിമകൾ കണ്ടവരുടെ ഉള്ളിൽ ഒരു ചിത്രം വരും. ആ സമയം നമ്മുടെ ഉള്ളൊന്ന് പിടക്കും. മനുഷ്യനെ വിഴുങ്ങാൻ കഴിയുന്ന ഭീമാകാരനായ പാമ്പ്. സിനിമകളിൽ കാണിക്കുന്ന പാമ്പിന്റെ വലിപ്പം ഒരു ഭാവനയല്ലേ എന്നാണ് മിക്കവരും ചിന്തിക്കുന്നത്. എന്നാൽ അങ്ങനെ പറഞ്ഞുകൊണ്ട് അത് തള്ളിക്കളയേണ്ട. അത്തരത്തിലൊരു വാർത്തയാണ് ഇപ്പോൾ പുറത്തുവരുന്നത്. ഇതുവരെ കണ്ടെത്തിയതിൽ വച്ച് ഏറ്റവും വലിയ അനക്കോണ്ടയെ ആമസോൺ മഴക്കാടുകളിൽ നിന്നും കണ്ടെത്തിയിരിക്കുകയാണ് ശാസ്ത്രജ്ഞർ.
ആമസോൺ മഴക്കാടുകളുടെ ഹൃദയഭാഗത്ത് നിന്നുമാണ് 26 അടി നീളമുള്ള അനക്കോണ്ടയെ കണ്ടെത്തിയത്. നാഷണൽ ജിയോഗ്രാഫിക് പര്യവേഷണത്തിനിടെ ടിവി വൈൽഡ് ലൈഫ് അവതാരകനായ പ്രൊഫസർ ഫ്രീക് വോങ്കാണ് ഈ ഭീമാകാരനായ പാമ്പിനെ കണ്ടെത്തിയിരിക്കുന്നത്. 26 അടി നീളമുള്ള കൂറ്റൻ പാമ്പിന് 440 പൗണ്ട് ഭാരമുണ്ട്. ഇതിന്റെ തലയ്ക്ക് മനുഷ്യന്റെ തലയുടെ അതേ വലിപ്പമാണ് ഉള്ളത്. ഇപ്പോൾ കണ്ടെത്തിയിരിക്കുന്ന പാമ്പാണ് ലോകത്തിലെ ഏറ്റവും വലുതും ഭാരമേറിയതുമായ പാമ്പ് എന്ന് ശാസ്ത്രജ്ഞർ പറയുന്നു. വിൽ സ്മിത്തിനൊപ്പം നാഷണൽ ജിയോഗ്രാഫിക്സ് ഡിസ്നി+ സീരീസായ പോൾ ടു പോൾ ചിത്രീകരണത്തിനിടെയാണ് ഈ ഭീമൻ പാമ്പിനെ കാണാനിടയായത്.
വടക്കൻ ഗ്രീൻ അനക്കോണ്ട എന്നർത്ഥം വരുന്ന ‘യൂനെക്ടസ് അക്കയിമ’ എന്ന ലാറ്റിൻ നാമമാണ് പുതിയ ഇനം പാമ്പിന് ഗവേഷകർ നൽകിയിരിക്കുന്നത്. ഇൻസ്റ്റാഗ്രാമിൽ പങ്കിട്ട ഒരു വീഡിയോയിൽ, പ്രൊഫസർ വോങ്ക് ഭീമാകാരമായ അനക്കോണ്ടയ്ക്കൊപ്പം നിർഭയമായി നീന്തുന്നത് കാണാം. ”ഞാൻ കണ്ടിട്ടുള്ളതിൽ വച്ച് ഏറ്റവും വലിയ അനക്കോണ്ടയെ വീഡിയോയിൽ കാണാം, ഒരു കാറിന്റെ ടയർ പോലെ കട്ടിയുള്ള, എട്ട് മീറ്റർ നീളവും 200 കിലോയിലധികം ഭാരവുമുള്ള പാമ്പാണ്. എന്റെ തലയോളം വലിപ്പമുള്ള തലയാണ് ഈ പാമ്പിന്റേത്. വിസ്മയപ്പിക്കുന്ന ഒരു രാക്ഷസൻ”- എന്ന് വീഡിയോയ്ക്ക് പ്രൊഫസർ വോങ്ക് അടിക്കുറിപ്പ് നൽകിയിരിക്കുന്നു.
അനക്കോണ്ടകൾ ഇരയെക്കാൾ വേഗത്തിൽ ചലിക്കുകയും അവയെ മുഴുവനായും ഞെരിച്ചമർത്തി ശ്വാസംമുട്ടിച്ച് വിഴുങ്ങുകയും ചെയ്യുന്നു. ജയൻ്റ് അനക്കോണ്ട എന്നറിയപ്പെടുന്ന ഗ്രീൻ അനക്കോണ്ടയുടെ ഒരു ഇനം മാത്രമേ ആമസോൺ വനങ്ങളിൽ ഉള്ളൂ എന്നായിരുന്നു ഇതുവരെയും ഗവേഷകർ വിശ്വസിച്ചിരുന്നത്. ഇതിനിടെയാണ് ‘യൂനെക്ടസ് അക്കയിമ’ എന്ന പുതിയ ഇനത്തെ ഗവേഷകർ കണ്ടെത്തിയിരിക്കുന്നത്. ഏകദേശം 10 ദശലക്ഷം വർഷങ്ങൾക്ക് മുമ്പ് ജീവിച്ചിരുന്ന തെക്കൻ ഗ്രീൻ അനക്കോണ്ടയിൽ നിന്ന് ജനിതകമായി 5.5 ശതമാനം വ്യത്യാസം പുതിയ അനകോണ്ടയ്ക്കുണ്ട്.
