ന്യൂഡൽഹി: പൗരത്വ ഭേദഗതി നിയമ പ്രകാരം പൗരത്വത്തിനായി അപേക്ഷിക്കുന്നവർക്ക് ഹെൽപ് ലൈൻ നമ്പർ പുറത്തിറക്കുമെന്ന് അറിയിച്ച് കേന്ദ്ര ആഭ്യന്തരമന്ത്രാലയം. ടോൾ-ഫ്രീ നമ്പറിലേക്ക് വിളിച്ച് ജനങ്ങൾക്ക് സംശയങ്ങൾ ദൂരീകരിക്കാം. രാവിലെ എട്ട് മണി മുതൽ രാത്രി എട്ടുമണി വരെ സേവനം ലഭ്യമാക്കുമെന്നും ആഭ്യന്തര മന്ത്രാലയം അറിയിച്ചു.
സിഎഎ സംബന്ധിച്ച് നിരവധി തെറ്റിദ്ധാരണകൾ പ്രചരിക്കുന്നുണ്ടെന്നും ആരുടേയും പൗരത്വം എടുത്തുകളയുന്നതല്ല നിയമമെന്നും നേരത്തെ ആഭ്യന്തര മന്ത്രാലയം വ്യക്തമാക്കിയിരുന്നു. ഏതൊരു മതത്തിൽപ്പെട്ടയാൾക്കും ഇന്ത്യയിൽ പൗരത്വത്തിനായി അപേക്ഷിക്കാം. എന്നാൽ സിഎഎ നിയമം പ്രത്യേക വിഭാഗത്തിന് വേണ്ടിയുള്ളതാണ്. മൂന്ന് അയൽരാജ്യങ്ങളിൽ നിന്നുള്ള ആറ് മതന്യൂനപക്ഷങ്ങളിലുള്ള ജനതയ്‌ക്കാണ് സിഎഎ ബാധകമാകുന്നത്. അതേസമയം ഏതെങ്കിലും ഒരു പ്രത്യേക മതവിഭാഗത്തിന്റെ നിലവിലുള്ള പൗരത്വത്തെ ഈ നിയമം ബാധിക്കില്ല. ഭാരതത്തിലേക്ക് കുടിയേറിയ മുസ്ലീം ജനതയ്‌ക്ക് സാഭ്വാവികമായിട്ടുള്ള രീതിയിലൂടെ പൗരത്വത്തിനായി അപേക്ഷിക്കുകയും ചെയ്യാമെന്ന് കേന്ദ്ര സർക്കാർ അറിയിച്ചു.
