പാലക്കാട്:ഓൺലൈൻ തട്ടിപ്പിന് ഇരയായി നഷ്ടപ്പെട്ട തുക തിരികെ പിടിക്കുന്നതിനായി ഓൺലൈൻ തട്ടിപ്പ് നടത്തിയ യുവാവ് പിടിയിൽ. തട്ടിപ്പിലൂടെ യുവതിയിൽ നിന്ന് 1.93 ലക്ഷം രൂപ കൈക്കലാക്കിയ കേസിലാണ് നടപടി. സംഭവത്തിൽ കോഴിക്കോട് ഫറോക്ക് സ്വദേശി സുജിത്തിനെയാണ് വടക്കഞ്ചേരി പോലീസ് അറസ്റ്റ് ചെയ്തത്.
മുമ്പ് ഓൺലൈൻ തട്ടിപ്പിലൂടെ യുവാവിന് 1.40 ലക്ഷം രൂപ നഷ്ടമായിരുന്നു. ഇത് തിരിച്ചു പിടിക്കുന്നതിനാണ് വടക്കഞ്ചേരി സ്വദേശിനിയിൽ നിന്നും സമാനരീതിയിൽ തട്ടിപ്പ് നടത്തി പണം കൈക്കലാക്കിയതെന്ന് പോലീസ് പറയുന്നു. തട്ടിപ്പിൽ 1.93 ലക്ഷം രൂപയാണ് യുവതിക്ക് നഷ്ടമായത്. വർക്ക് ഫ്രം ഹോം എന്ന വ്യാജേന സാമൂഹിക മാദ്ധ്യമത്തിൽ എത്തിയ സന്ദേശത്തിലൂടെയാണ് യുവതി കെണിയിൽ അകപ്പെട്ടത്.
ആദ്യ ഘട്ടത്തിൽ ഓൺലൈൻ മുഖേന വിവിധ ടാസ്‌കുകൾ പൂർത്തിയാക്കിയപ്പോൾ പണം ലഭിച്ചു. പിന്നാലെ നിശ്ചിത തുക അടച്ച് ടാസ്‌ക് തിരഞ്ഞെടുക്കുന്ന രീതിയായി. ഇതിലും പണം തിരികെ നൽകി വിശ്വാസം വർദ്ധിപ്പിച്ചു. പിന്നീടാണ് ഉയർന്ന തുക കൈക്കലാക്കിയത്. പണം ലഭിക്കാതെ വന്നതോടെ തട്ടിപ്പാണെന്ന സംശയം തോന്നിയ യുവതി പരാതി നൽകുകയായിരുന്നു.
