നായകളും പൂച്ചകളുമില്ലാത്ത വീടുകൾ വിരളമായിരിക്കും. നമ്മുടെ ഒരു കുടുംബാംഗത്തെ പോലെയാണ് ഈ വളർത്തു മൃഗങ്ങൾ. നമുക്കൊപ്പം കഴിച്ചും ഉറങ്ങിയും ജീവിക്കുന്ന നായകളും പൂച്ചകളും അവയുടേതായ രീതിയിലായിരിക്കും ഉടമയോട് സ്നേഹം പ്രകടിപ്പിക്കുക. നമ്മുടെ ശരീരത്തിൽ അവയുടെ തലയുരച്ചും, നക്കിയുമെല്ലാമായിരിക്കും ഇത്തരം വളർത്തു മൃഗങ്ങൾ സനേഹപ്രകടനം നടത്തുക. എന്നാൽ ഇത്തരത്തിലുള്ള സ്നേഹപ്രകടനം മനുഷ്യർക്ക് ദോഷകരമായി ബാധിക്കുമെന്നാണ് വിദഗ്ധർ പറയുന്നത്.
നായകളുടെയും പൂച്ചകളുടെയും നക്കിയുള്ള സ്നേഹപ്രകടനം നിരവധി ആരോഗ്യപ്രശ്നങ്ങൾക്ക് വഴിവയ്ക്കുമെന്ന് കണ്ടെത്തലുകളിൽ പറയുന്നു. നായ്ക്കളുടെയും പൂച്ചകളുടെയും വായയിൽ അടങ്ങിയിരിക്കുന്ന കാപ്നോസൈറ്റോഫോഗ കാനിമോർസസ് എന്ന ബാക്ടീരിയയാണ് ഇതിനുള്ള പ്രധാന കാരണം. വളർത്തുമൃഗങ്ങൾ നമ്മെ നക്കുമ്പോഴും ദേഹത്ത് ഉരയ്ക്കുമ്പോഴും ഇവയുടെ സലൈവ വഴി ഇത്തരം ബാക്ടീരിയകൾ നമ്മുടെ ശരീരത്തിലെത്തുകയും ജീവൻ തന്നെ അപകടത്തിലാക്കുകയും ചെയ്യുന്നു. വളർത്തുമൃഗങ്ങളിൽ കാണപ്പെടുന്ന പോസ്റ്റിയുറെല്ലല മൾടോസിഡ എന്ന സൂക്ഷ്മാണു മനുഷ്യ ശരീരത്തിൽ പ്രവേശിച്ചാൽ തലച്ചോറിനെ ബാധിക്കുന്ന ഗുരുതര രോഗങ്ങൾക്കടക്കം കാരണമാവുന്നു.
കുട്ടികളെയും പ്രായമായവരെയും ഇത്തരത്തിലുള്ള അണുബാധകളേൽക്കാനുള്ള സാധ്യത കൂടുതലാണ്. അതിനാൽ തന്നെ നായ്ക്കളും പൂച്ചകളും സ്നേഹപ്രകടനം നടത്തുമ്പോൾ കുറച്ച് അകലം പാലിക്കാൻ ശ്രദ്ധിക്കുക. വളർത്തുമൃഗങ്ങളുമായുള്ള ജീവിതം അമിത ഉത്കണ്ഠയും സമ്മർദ്ദവും കുറയ്ക്കുമെന്നുള്ള പഠനങ്ങളുമുണ്ടെങ്കിലും സ്നേഹപ്രകടനം അമിതമാകാതിരിക്കാൻ പരമാവധി ശ്രമിക്കേണ്ടതാണ്.
