പത്തനംതിട്ട: എൽഡിഎഫിന്റെ തിരഞ്ഞെടുപ്പ് പ്രചാരണ പരിപാടിയിൽ കുടുംബശ്രീ പ്രവർത്തകരെ നിർബന്ധിച്ച് പങ്കെടുപ്പിക്കാൻ നിർദേശം. കേരളത്തിലെ കുടുംബശ്രീയുടെ പിതാവാണ് തോമസ് ഐസക്ക് എന്നാണ് കുടുംബശ്രീ ചെയർപേഴ്‌സൺ സന്ദേശം നൽകിയിരിക്കുന്നത്. നിർദേശം പാലിക്കാതിരുന്ന കുടുംബശ്രീ അംഗങ്ങളെ ഭീഷണിപ്പെടുത്തുകയും ചെയ്തിട്ടുണ്ട്. വായ്പയുടെ കാര്യം പറഞ്ഞ് ഓടി വരുന്നതുപോലെ പാർട്ടി പരിപാടിക്കും വരണമെന്നാണ് മല്ലപ്പള്ളി കുന്നന്താനം ഗ്രാമപഞ്ചായത്ത് കുടുംബശ്രീ ചെയർപേഴ്‌സൺ രജനി അജിത്തിന്റെ സന്ദേശത്തിൽ പറയുന്നത്.
രണ്ടാഴ്ച മുമ്പ് സിപിഎം പൊളിറ്റ് ബ്യൂറോ അംഗം വൃന്ദ കരാട്ട് പങ്കെടുത്ത പരിപാടിയിലും കുടുംബശ്രീ പ്രവർത്തകർ പങ്കെടുക്കണമെന്ന് നിർദേശം നൽകിയിരുന്നു. മഹിള അസോസിയേഷന്റെ പരിപാടി വനിതാ ദിന പരിപാടിയാണെന്ന് പറഞ്ഞായിരുന്നു കുടുംബശ്രീ പ്രവർത്തകരെ ഇതിൽ പങ്കെടുപ്പിക്കാൻ ശ്രമിച്ചത്.
