രാംലല്ലയെ ദർശിക്കുന്നതിനിടെ വികാഭരിതരായി ലഖ്‌നൗ സൂപ്പർ ജയന്റ്‌സിന്റെ ദക്ഷിണാഫ്രിക്കൻ സ്പിന്നർ കേശവ് മഹാരാജും ഇതിഹാസ താരവും ടീമിന്റെ ഫീൽഡിംഗ് കോച്ചുമായ ജോണ്ടി റോഡ്‌സും. ലഖ്‌നൗ സൂപ്പർ ജയന്റ്‌സ് തങ്ങളുടെ ഇൻസ്റ്റഗ്രാം അക്കൗണ്ടിൽ പങ്കുവച്ച വീഡിയോയിലാണ് ദർശനം നടത്തുന്നതിനിടെ ഇരുവരും കണ്ണീരണിയുന്നതും പ്രാർത്ഥിക്കുന്നതുമായ ദൃശ്യങ്ങൾ കണ്ടത്. കോച്ച് ജസ്റ്റിൻ ലാംഗർ, ജോണ്ടി റോഡ്സ്, കേശവ് മഹാരാജ്, രവി ബിഷ്ണോയ് തുടങ്ങിയ താരങ്ങളാണ് ദർശനം നടത്തിയത്.
അയോദ്ധ്യയിലെ രാമക്ഷേത്രത്തിൽ ക്ഷേത്രത്തിൽ ദർശനം നടത്താൻ കഴിഞ്ഞതിൽ അതിയായ സന്തോഷമുണ്ടെന്ന് കേശവ് മഹാരാജ് പറഞ്ഞു. ജയ് ശ്രീറാം എല്ലാവർക്കും അനുഗ്രഹമുണ്ടാകട്ടെ എന്ന അടിക്കുറിപ്പോടെ രാംലല്ലയെ ദർശിക്കുന്നതിന്റെ ചിത്രവും കേശവ് മഹാരാജ് പങ്കുവച്ചിട്ടുണ്ട്. പ്രാണപ്രതിഷ്ഠയ്‌ക്കും താരം ആശംസകൾ അറിയിച്ചിരുന്നു.
രാംലല്ലയെ ദർശിച്ചത് ദീർഘകാലം ഓർമ്മയിൽ സൂക്ഷിക്കുമെന്ന് ജോണ്ടി റോഡ്സ് പറഞ്ഞു. ഈറനണിഞ്ഞ കണ്ണുകളോടെ ഇത് പറഞ്ഞ അദ്ദേഹം ജയ് ശ്രീറാം വിളിച്ചാണ് മടങ്ങിയത്. ഐപിഎല്ലിലെ ലക്‌നൗ സൂപ്പർ ജയന്റ്‌സിന്റെ ആദ്യ മത്സരം ഇന്ന് രാജസ്ഥാൻ റോയൽസിനെതിരെയാണ്.
