ഗോവയിൽ നിന്ന് ബിജെപി ടിക്കറ്റിൽ ജനവിധി തേടുന്ന ആദ്യ വനിത; ?അറിയാം പല്ലവി ഡെംപോയെ..

പനാജി: ലോക്സഭാ തെരഞ്ഞെടുപ്പിൽ സൗത്ത് ഗോവ പാർലമെന്റ് മണ്ഡലത്തിൽ നിന്ന് മത്സരിക്കുന്ന ബിജെപി സ്ഥാനാർത്ഥിക്ക് ഒരു പ്രത്യേകതയുണ്ട്. സംസ്ഥാനത്ത് നിന്ന് ബിജെപി, പാർലമെന്റിലേക്ക് മത്സരിപ്പിക്കുന്ന ആദ്യ വനിതാ സ്ഥാനാർത്ഥിയാണ്. കഴിഞ്ഞ ദിവസം ബിജെപി പുറത്തുവിട്ട അഞ്ചാംഘട്ട സ്ഥാനാർത്ഥി പട്ടികയിലാണ് പല്ലവി ഡെംപോ ഇടം പിടിച്ചത്. പല്ലവി ഡെംപോ ആരാണെന്ന് അറിയാം…

ആരാണ് പല്ലവി ഡെംപോ?
(1.) രണ്ട് പാർലമെന്റ് മണ്ഡലങ്ങളാണ് ഗോവയിലുള്ളത്. സംസ്ഥാനത്ത് നിന്ന് പാർലമെന്റിലേക്ക് എൻഡിഎ മത്സരിപ്പിക്കുന്ന ആദ്യ വനിതയാണ് പല്ലവി ഡെംപോ.

(2.) ഗോവ ആസ്ഥാനമായുള്ള ഡെംപോ ഗ്രൂപ്പ് ഓഫ് കമ്പനീസിന്റെ ചെയർമാനും വ്യവസായിയുമായ ശ്രീനിവാസ് ഡെംപോയാണ് പല്ലവിയുടെ ഭർത്താവ്. മുമ്പ്, ശ്രീനിവാസിന്റെ മുത്തച്ഛൻ വൈകുണ്ഠറാവു സിനായ് ഡെമോ തെരഞ്ഞെടുപ്പിൽ മത്സരിച്ചിട്ടുണ്ട്. 1963 ലെ നിയമസഭാ തെരഞ്ഞെടുപ്പിൽ കോൺഗ്രസിന് വേണ്ടിയാണ് അദ്ദേഹം മത്സരിച്ചത്.

(3.) ഡെംപോ ഇൻഡസ്ട്രീസ് ലിമിറ്റഡിന്റെ എക്സിക്യൂട്ടീവ് ഡയറക്ടർ കൂടിയാണ് പല്ലവി ഡെംപോ

(4.) ഗോവയിലെ പാർവതിഭായ് ചൗഗുലെ കോളേജിൽ നിന്ന് രസതന്ത്രത്തിൽ ബിരുദം കരസ്ഥമാക്കിയ പല്ലവി, പൂനെയിലെ MIT-WPU-ൽ നിന്ന് ബിസിനസ് മാനേജ്മെന്റിൽ ബിരുദാനന്തര ബിരുദം നേടിയിട്ടുണ്ട്.

തന്നെ സ്ഥാനാർത്ഥിയാക്കിയതിൽ ബിജെപി നേതൃത്വത്തിന് നന്ദി അറിയിക്കുന്നതായി സ്ഥാനാർത്ഥി പ്രഖ്യാപനത്തിന് പിന്നാലെ പല്ലവി പറഞ്ഞു. സൗത്ത് ഗോവയിൽ നിന്ന് വിജയിക്കാനുള്ള എല്ലാ ശ്രമങ്ങളും ഞാൻ നടത്തും. പ്രധാനമന്ത്രി നരേന്ദ്രമോദിയുടെ നേതൃപാടവത്തിൽ ഞാൻ വിശ്വസിക്കുന്നു. ജാതിയോ മതമോ പരിഗണിക്കാതെ എല്ലാ ജനങ്ങളുടെയും ഉന്നമനവും അവരുടെ ഉയർച്ചയുമാണ് ഞാൻ ലക്ഷ്യം വയ്‌ക്കുന്നതെന്നും പല്ലവി വ്യക്തമാക്കി. കോൺഗ്രസിന്റെ ഫ്രാൻസിസ്‌കോ സർദിന്ഹയാണ് നിലവിൽ സൗത്ത് ഗോവ എം.പി. മെയ് 7-നാണ് ഗോവയിൽ ലോക്‌സഭാ തെരഞ്ഞെടുപ്പ്.