ലക്നൗ: സ്കൂൾ അദ്ധ്യാപികയ്‌ക്ക് നേരെ പ്രിൻസിപ്പലിന്റെ അതിക്രമം. സ്കൂൾ പ്രവർത്തി സമയത്ത് ക്ലാസ് എടുക്കാതെ മുഖത്തു ഫേഷ്യൽ ചെയ്യുകയായിരുന്നു പ്രിൻസിപ്പൽ. ഈ ദൃശ്യങ്ങൾ പകർത്തിയ അദ്ധ്യാപികയ്‌ക്ക് നേരെയാണ് ആക്രമണമുണ്ടായത്. ഉത്തർപ്രദേശിലെ ഉന്നാവോയിലുള്ള ഒരു പ്രൈമറി സ്കൂളിലാണ് സംഭവം. പ്രിൻസിപ്പൽ അദ്ധ്യാപികയെ ഇഷ്ടികകൊണ്ട് ഇടിക്കുകയും കൈ കടിച്ചു മുറിവേൽപ്പിക്കുകയും ചെയ്തു.
സ്കൂൾ പ്രവർത്തി സമയത്ത് കുട്ടികൾക്ക് ക്ലാസെടുക്കാതെയാണ് പ്രിൻസിപ്പൽ ക്യാമ്പസിന്റെ അടുക്കളയിൽ ഇരുന്ന് മുഖത്ത് സൗന്ദര്യ വർദ്ധനവിനുള്ള ഫേഷ്യൽ ചെയ്തത്. ഇത് അദ്ധ്യാപിക കയ്യോടെ പിടികൂടുകയായിയുന്നു. അദ്ധ്യാപിക പകർത്തിയ സംഭവത്തിന്റെ ദൃശ്യങ്ങൾ സാമൂഹ്യ മാധ്യമങ്ങളിൽ വ്യാപകമായി പ്രചരിച്ചിരുന്നു. വീഡിയോ വൈറലായതോടെ ബ്ലോക്ക് വിദ്യാഭ്യാസ ഓഫീസർ സംഭവത്തിൽ അന്വേഷണം പ്രഖ്യാപിച്ചു. പ്രിൻസിപ്പലിനെതിരെ അദ്ധ്യാപിക പൊലീസിൽ പരാതിയും നൽകിയിട്ടുണ്ട്.
