കാസർകോട്: വയോധികർക്കായുള്ള വീട്ടിലെ വോട്ട് സംവിധാനത്തിൽ വീണ്ടും പരാതി. കാസർകോട് മണ്ഡലത്തിലും കണ്ണൂർ പേരാവൂരിലുമാണ് സിപിഎമ്മിനെതിരെ പരാതി ഉയരുന്നത്. കാസർകോട് മണ്ഡലത്തിൽ 92-കാരനെ കബളിപ്പിച്ച് സഹായി വോട്ടിന് ഒപ്പിട്ട് വാങ്ങി ബ്രാഞ്ച് സെക്രട്ടറി വോട്ട് ചെയ്തുവെന്നാണ് ഉയരുന്ന പരാതി. പയ്യന്നൂർ സ്വദേശി മാധവൻ വെളിച്ചപ്പാടിന്റെ വോട്ടാണ് സിപിഎം ബ്രാഞ്ച് സെക്രട്ടറി വി.വി. സുരേഷ് ചെയ്തത്.
കണ്ണൂരിലും സിപിഎമ്മിനെതിരെ പരാതിയുമായി യുഡിഎഫ് രംഗത്തെത്തിയിട്ടുണ്ട്. പേരാവൂരിൽ നൂറ്റിയാറുകാരിയെ നിർബന്ധിച്ച് വോട്ട് ചെയ്യിപ്പിച്ചു എന്നാണ് പരാതി. സിപിഎം ബ്രാഞ്ച് കമ്മിറ്റി അംഗത്തിനെതിരെയാണ് യുഡിഎഫ് പരാതി നൽകിയത്.
കല്യാശേരിയിൽ ആളുമാറി വോട്ടു ചെയ്ത സംഭവം വിവാദമായതിന് പിന്നാലെയാണ് വീണ്ടും ഇത്തരം സംഭവങ്ങൾ അരങ്ങേറുന്നത്. കല്യാശേരിയിലെ 164-ാം ബൂത്തിലാണ് 92 വയസുള്ള ദേവിയുടെ വോട്ട് സിപിഎം മുൻ ബ്രാഞ്ച് സെക്രട്ടറി ഗണേശൻ നേരിട്ട് രേഖപ്പെടുത്തിയത്. വീട്ടിലെത്തി വോട്ട് രേഖപ്പെടുത്തുന്നതിനിടെ വീഴ്ച വരുത്തിയ പോളിംഗ് ഉദ്യോഗസ്ഥരെ കണ്ണൂർ ജില്ലാ കളക്ടർ സസ്പെൻഡ് ചെയ്തിരുന്നു.
