തെലുങ്ക് ഫിലിം ഡയറക്ടേഴ്സ് അസോസിയേഷന് 35 ലക്ഷം രൂപ ധനസഹായം നൽകി നടൻ പ്രഭാസ്. മെയ് നാലിന് ഫിലിം ഡയറക്ടേഴ്സ് അസോസിയേഷനുകൾ ചേർന്ന് സംഘടിപ്പിക്കുന്ന അസോസിയേഷൻ ഡേ എന്ന പരിപാടിയിലാണ് പണം കൈമാറുന്നത്. സിനിമാ പ്രവർത്തകരുടെ വളർച്ചയ്ക്ക് ചെറിയൊരു സഹായമായാണ് ഈ തുക കൈമാറുന്നതെന്ന് പ്രഭാസ് വ്യക്തമാക്കിയിട്ടുണ്ട്.
അസോസിയേഷൻ അംഗങ്ങൾ പ്രഭാസിന്റെ ഈ തീരുമാനത്തിൽ സന്തോഷം പ്രകടിപ്പിക്കുകയും നടന് നന്ദി അറിയിക്കുകയും ചെയ്തു. അസോസിയേഷന് വളർച്ചയുണ്ടാകുമെന്ന് വിശ്വാസമുണ്ടെന്നും അംഗങ്ങൾ അറിയിച്ചു. വാർത്താ സമ്മേളനത്തിലാണ് അംഗങ്ങൾ ഇക്കാര്യം അറിയിച്ചത്.
ഹൈദരാബാദിലെ എൽബി സ്റ്റേഡിയത്തിലാണ് അസോസിയേഷൻ ഡേ നടക്കുന്നത്.
പ്രമുഖ അഭിനേതാക്കൾ, സംവിധായകർ, സാങ്കേതിക വിദഗ്ധർ എന്നിവർ പരിപാടിയിൽ പങ്കെടുക്കും. ചിരഞ്ജീവി, നാനി, നിതിൻ, അല്ലരി നരേഷ് തുടങ്ങി നിരവധി താരങ്ങളെ ചടങ്ങിലേക്ക് ക്ഷണിച്ചിട്ടുണ്ടെന്ന് അംഗങ്ങൾ അറിയിച്ചു.
പ്രഭാസ് നായകനാകുന്ന ഏറ്റവും പുതിയ ചിത്രമാണ് കൽക്കി 2898 എഡി. നാഗ് അശ്വിൻ സംവിധാനം ചെയ്യുന്ന ചിത്രത്തിൽ വളരെ വ്യത്യസ്തമായ കഥാപാത്രത്തെയാണ് പ്രഭാസ് അവതരിപ്പിക്കുന്നത്. മെയ് എട്ടിനാണ് ചിത്രം തിയേറ്ററുകളിലെത്തുന്നത്. ഇന്ത്യൻ മിത്തോളജി ആസ്പദമാക്കി ഒരുങ്ങുന്ന ചിത്രത്തിൽ അമിതാഭ് ബച്ചൻ, കമൽഹാസൻ, ദീപിക പദുക്കോൺ, ദിഷ പടാനി തുടങ്ങിയവരും പ്രധാന വേഷങ്ങൾ ചെയ്യുന്നു.
