ഷിംല: കനത്ത മഞ്ഞുവീഴ്ചയെ തുടർന്ന് ഹിമാചൽപ്രദേശിലെ 60 റോഡുകൾ അടച്ചു. മൂന്ന് ദേശീയ പാതകളിലെയും ഗതാഗതം വിലക്കിയിട്ടുണ്ട്. പത്ത് ജില്ലകളിൽ അടുത്ത 48 മണിക്കൂറുകളിൽ മേഘവിസ്ഫോടനത്തിനും ആലിപ്പഴ വീഴ്ചയ്‌ക്കു മഴയ്‌ക്കും സാധ്യതയുളളതായി മുന്നറിയിപ്പുണ്ട്.
ചമ്പ, കാങ്ക്ര, കുളു, ലഹോൾ സ്പിതി തുടങ്ങിയ മേഖലകളിലെ റോഡുകളാണ് അടച്ചിട്ടത്. മഞ്ഞുവീഴ്ച ഇനിയും ശക്തമാകാൻ സാദ്ധ്യതയുളളതിനാൽ ഓറഞ്ച് അലർട്ട് പുറപ്പെടുവിച്ചതായും അധികൃതർ അറിയിച്ചു.
ബിലാസ്പൂർ, ചമ്പ, ഹാമിർപൂർ, കാങ്ക്ര, കുളു, മാണ്ഡി, ഷിംല, സിർമൗർ, സോളൻ, ഉന എന്നിവിടങ്ങളിലാണ് ഇടിമിന്നലിനും ശക്തമായ കാറ്റിനും സാധ്യതയുളളതായി മുന്നറിയിപ്പുളളത്. മണിക്കൂറിൽ 30 മുതൽ 40 കിലോമീറ്റർ വരെ വേഗതയിൽ വീശിയടിച്ചേക്കാവുന്ന കാറ്റിനും സാധ്യതയുണ്ടെന്ന് മുന്നറിയിപ്പുണ്ട്.
