ന്യൂഡൽഹി : ഫിലിപ്പീൻസിലെ ബാറ്റൻ തുറമുഖം ഏറ്റെടുക്കാൻ അദാനി ഗ്രൂപ്പ് . പ്രസിഡന്റ് ഫെർഡിനാൻഡ് ആർ മാർക്കോസ് ജൂനിയറുമായി അദാനി പോർട്ട്സ് ആൻഡ് സ്പെഷ്യൽ ഇക്കണോമിക് സോൺ മാനേജിംഗ് ഡയറക്ടർ കരൺ അദാനി കൂടിക്കാഴ്ച്ച നടത്തിയിരുന്നു . തുറമുഖം ഏറ്റെടുക്കാൻ അദാനി ഗ്രൂപ്പ് താല്പര്യം അറിയിച്ചതായാണ് സൂചന .
‘ ഒരു സ്വകാര്യ മേഖല എന്ന നിലയിൽ, ഞങ്ങൾ എപ്പോഴും അന്വേഷിക്കുന്നത് സ്ഥിരതയാണ്. നിയന്ത്രണത്തിലെ സ്ഥിരത, ഞങ്ങൾ പ്രവർത്തിക്കുന്ന പരിസ്ഥിതിയിലെ സ്ഥിരത. അതാണ് നിങ്ങൾ നൽകുന്നത്, ”കരൺ അദാനി പ്രസിഡൻ്റ് മാർക്കോസിനോട് പറഞ്ഞതായു ഫിലിപ്പീൻസ് പ്രസിഡൻ്റിന്റെ ഓഫീസിൽ നിന്നുള്ള വാർത്താക്കുറിപ്പിൽ പറയുന്നു .
പനമാക്സ് കപ്പലുകളെ ഉൾക്കൊള്ളാൻ കഴിയുന്ന 25 മീറ്റർ ആഴമുള്ള തുറമുഖം വികസിപ്പിക്കാനാണ് കമ്പനി പദ്ധതിയിടുന്നത്. മാത്രമല്ല ഫിലിപ്പീൻസിലെ മറ്റ് തുറമുഖങ്ങൾ, വിമാനത്താവളങ്ങൾ, ഊർജം, പ്രതിരോധം തുടങ്ങിയ മേഖലകളിലും അദാനി ഗ്രൂപ്പ് നിക്ഷേപം നടത്താൻ പദ്ധതിയിടുന്നുണ്ട്.
ഇന്ത്യയിലുടനീളമുള്ള 13 തുറമുഖങ്ങളിലും ടെർമിനലുകളിലും അദാനി പോർട്ട്സ് ആൻഡ് സ്പെഷ്യൽ ഇക്കണോമിക് സോൺ പ്രവർത്തിക്കുന്നുണ്ട് . ദക്ഷിണ ചൈനാക്കടലിൽ ചൈന–ഫിലിപ്പീൻസ് സംഘർഷം തുടരുന്നതിനിടയിൽ ഫിലിപ്പീൻസിന് പിന്തുണ പ്രഖ്യാപിച്ച് ഇന്ത്യ രംഗത്തെത്തിയിരുന്നു . ഇതിനിടെ തുറമുഖങ്ങൾ കൂടി ഇന്ത്യയുടെ വരുതിയിലാകുന്നതോടെ ചൈനയ്ക്ക് വൻ തിരിച്ചടിയാകുമെന്നാണ് റിപ്പോർട്ട് .
