രാജ്യത്തിന്റെ വ്യവസായ പ്രമുഖൻമാരിൽ പ്രഥമ സ്ഥാനമാണ് റിലയൻസ് റിലയൻസ് ഇൻഡസ്ട്രീസിന്റെ ചെയർമാൻ മുകേഷ് അംബാനിക്കുള്ളത്. ഏകദേശം 920,920 കോടി രൂപയാണ് മുകേഷ് അംബാനിയുടെ ആസ്തി. രാജ്യത്തെ ഏറ്റവും മൂല്യമുള്ള കമ്പനികളിലൊന്നാണ് റിലയൻസ് ഇൻഡസ്ട്രീസ്. 1,887,000 കോടി രൂപയിലധികമാണ് വിപണി മൂല്യം. മുകേഷിന്റെ ഭാര്യ നിതയും മക്കളായ ഇഷ, ആകാശ്, അനന്ത് എന്നിവരും ബിസിനസ് ഗ്രൂപ്പിന്റെ ഭാഗമാണ്. എന്നാൽ കമ്പനിയിൽ ഏറ്റവും കൂടുതൽ ശമ്പളം വാങ്ങുന്നത് ആരാണെന്ന് അറിയാമോ? മുകേഷ് അംബാനിയുടെ അടുത്ത അനുയായിയും ബന്ധവുമായ നിഖിൽ മെസ്വാനിയാണ് റെക്കോർഡ് പ്രതിഫലം കൈപ്പറ്റുന്നത്.
ആരാണ് നിഖിൽ മെസ്വാനി?
റിലയൻസ് സ്ഥാപക ഡയറക്ടർമാരിൽ ഒരാളായ റസിക്ലാൽ മെസ്വാനിയുടെ മകനാണ് നിഖിൽ മെസ്വാനി. അദ്ദേഹത്തിന്റെ ജ്യേഷ്ഠൻ ഹിതാൽ മെസ്വാനി റിലയൻസ് ഇൻഡസ്ട്രീസിൽ എക്സിക്യൂട്ടീവ് ഡയറക്ടറാണ് . മുകേഷ് അംബാനിയുടെ ആദ്യ ബോസും ഗുരുവും കൂടിയാണ് നിഖിൽ മെസ്വാനിയുടെ പിതാവ് റസിക്ലാൽ മെസ്വാനി.
മുംബൈ സർവകലാശാലയിലായിരുന്നു നിഖിലിന്റെ ബിരുദപഠനം. തുടർന്ന് അമേരിക്കയിലെ മസാച്യുസെറ്റ്സ് സർവകലാശാലയിൽ കെമിക്കൽ എഞ്ചിനീയറിംഗിൽ ഉപരിപഠനം. 1986-ൽ കമ്പനിയിൽ ചേർന്ന അദ്ദേഹം മുഴുവൻ സമയ ഡയറക്ടറായി നിയമിതനായി. 1988 ജൂലൈയിൽ എക്സിക്യൂട്ടീവ് ഡയറക്ടറായി സ്ഥാനക്കയറ്റം ലഭിച്ചു. റിലയൻസിന്റെ ഉടമസ്ഥതയിലുള്ള ഐപിഎൽ ടീമായ മുംബൈ ഇന്ത്യൻസ്, ഇന്ത്യൻ സൂപ്പർ ലീഗ്, കമ്പനിയുടെ മറ്റ് കായിക സംരംഭങ്ങൾ എന്നിവയുടെ കാര്യങ്ങളിലും നിഖിൽ മെസ്വാനി പങ്കാളിയാണ്
മുകേഷ് അംബാനിയെക്കാൾ കൂടുതൽ ശമ്പളം
24 കോടിയിലധികം രൂപയാണ് നിഖിൽ മേസ്വാനിയുടെ വാർഷിക ശമ്പളം. ഫോബ്സ് മാസികയുടെ കണക്കനുസരിച്ച് മുകേഷ് അംബാനിക്ക് നിഖിലിനേക്കാൽ ശമ്പളം കുറവാണ്. പത്ത് വർഷമായി മുകേഷിന്റെ ശമ്പളം 15 കോടി രൂപയാണ്. കൊവിഡിന് ശേഷം മുകേഷ് അംബാനി മാസശമ്പളം കൈപ്പറ്റുന്ന രീതി അവസാനിപ്പിച്ചിരുന്നു. കമ്പനി രേഖകൾ പ്രകാരം അദ്ദേഹത്തിന്റെ ശമ്പളം ‘പൂജ്യം’ എന്നാണ് രേഖപ്പെടുത്തിയിരിക്കുന്നത്.