ഉത്തര കൊറിയൻ ഏകാധിപതി കിം ജോങ്ങ് ഉന്നിനെ പുകഴ്ത്തുന്ന വൈറൽ ഗാനമായ ‘ഫ്രണ്ട്ലി ഫാദർ ‘നിരോധിക്കുമെന്ന് ദക്ഷിണ കൊറിയ . കിമ്മിനെ “ഫ്രണ്ട്ലി ഫാദർ ”, “മഹത്തായ നേതാവ്” എന്നിങ്ങനെ വിശേഷിപ്പിക്കുന്ന മ്യൂസിക് വീഡിയോ ടിക് ടോക്കിൽ വൈറലായതായി ദക്ഷിണ കൊറിയയുടെ മീഡിയ റെഗുലേറ്ററി ബോഡി പറഞ്ഞു. എന്നാൽ ഇത് രാജ്യത്തിന്റെ ദേശീയ സുരക്ഷാ നിയമം ലംഘിച്ചതിനാൽ നിരോധിക്കുകയാണെന്നും കൊറിയ കമ്മ്യൂണിക്കേഷൻസ് സ്റ്റാൻഡേർഡ് കമ്മീഷൻ പ്രസ്താവനയിൽ പറയുന്നു.
“വീഡിയോ ദക്ഷിണ കൊറിയയ്ക്കെതിരായ മാനസിക യുദ്ധവുമായി ബന്ധപ്പെട്ട ഉള്ളടക്കമാണ്. കാരണം ഇത് പുറം ലോകവുമായി ബന്ധപ്പെടാൻ പ്രവർത്തിക്കുന്ന ഒരു ചാനലിൽ പോസ്റ്റ് ചെയ്തതാണ്, മാത്രമല്ല ഇത് പ്രധാനമായും കിമ്മിനെ ഏകപക്ഷീയമായി വിഗ്രഹവൽക്കരിക്കുകയും മഹത്വവത്കരിക്കുകയും ചെയ്യുന്നു.”- പ്രസ്താവനയിൽ പറയുന്നു.
സോഷ്യൽ മീഡിയ പ്ലാറ്റ്ഫോമുകളിൽ നിന്ന് ഗാനം എങ്ങനെ തടയുമെന്ന് വ്യക്തമല്ലെങ്കിലും, മ്യൂസിക് വീഡിയോയുടെ 29 ഓളം പതിപ്പുകൾ ബ്ലോക്ക് ചെയ്യാൻ അധികൃതർ തീരുമാനിച്ചു. ദക്ഷിണ കൊറിയയുടെ നാഷണൽ ഇൻ്റലിജൻസ് സർവീസ് നിരോധനം ആവശ്യപ്പെട്ടതിനെ തുടർന്നാണ് തീരുമാനം. കുട്ടികൾ മുതൽ സൈനികർ വരെ വ്യത്യസ്ത പശ്ചാത്തലത്തിലുള്ള ഉത്തര കൊറിയക്കാരെയും മെഡിക്കൽ സ്റ്റാഫിനെയും ഉൾക്കൊള്ളുന്ന ഗാനം ഉത്തര കൊറിയ കഴിഞ്ഞ മാസമാണ് പുറത്തിറക്കിയത് .