സിനിമ ചെയ്ത് കഴിഞ്ഞാൽ ആരോടും കൂടുതൽ അടുപ്പം കാണിക്കാറില്ലെന്ന് നടി മഹിമ നമ്പ്യാർ. ആവശ്യമില്ലാത്ത സൗഹൃദങ്ങളൊന്നും കൂടെ കൊണ്ട് നടക്കാറില്ലെന്നും തനിക്ക് അതിന്റെ ആവശ്യമില്ലെന്നും താരം പറഞ്ഞു. തന്റെ പേഴ്സണൽ സ്പേസിലേക്ക് മറ്റൊരാളെ കൊണ്ടു വരുന്നതിനോട് താല്പര്യമില്ലെന്നും മഹിമ കൂട്ടിച്ചേർത്തു. ഒരു അഭിമുഖത്തിനിടയിലായിരുന്നു നടി ഇക്കാര്യങ്ങൾ പറഞ്ഞത്.
‘ഒരു സിനിമ കഴിഞ്ഞാൽ ഡിറ്റാച്ഡ് ആകുന്ന സ്വഭാവം എനിക്കുണ്ട്. കാണുമ്പോൾ നല്ല ഫ്രണ്ട്ലി ആയിട്ട് സംസാരിക്കുമെങ്കിലും പൊതുവെ, സിനിമ കഴിയുമ്പോൾ ആവശ്യമില്ലാത്ത സൗഹൃദങ്ങളൊന്നും ഞാൻ കൂടെക്കൊണ്ട് നടക്കാറില്ല. അതിൽ ആണുങ്ങൾ പെണ്ണുങ്ങൾ എന്നൊന്നുമില്ല. എനിക്ക് ആവശ്യമില്ലാത്ത ഒരു ബന്ധങ്ങളും ഞാൻ മെയിന്റയിൻ ചെയ്യാറില്ല.
സിനിമയിലുള്ള ആരോടും ഞാൻ കയർത്ത് സംസാരിക്കുകയോ, മുഖം ചുളിഞ്ഞ് സംസാരിക്കുകയോ ഒന്നും ചെയ്യാറില്ല. അത്രയും പോരെ ഒരാൾക്ക്, അങ്ങനൊരു ബന്ധം എനിക്കുണ്ട്. നമ്മൾ എന്തിനാണ് ഭയങ്കരമായ ഒരു സൗഹൃദമൊക്കെ സൂക്ഷിക്കുന്നത്. എന്തിനാണ് അവര്ക്ക് നമ്മുടെ കാര്യങ്ങളിലേക്ക് ഓവര് ആയി ഇടപെടാന് ഒരു സ്പേസ് കൊടുക്കുകയും വേദനിപ്പിക്കാനുള്ള ഒരു സാഹചര്യം നമ്മള് ആയിട്ട് ഉണ്ടാക്കുകയും ചെയ്യുന്നത്. അതിന്റെ ഒന്നും ആവശ്യം ഇല്ലല്ലോ…
ഓവര് ആയിട്ട് ആള്ക്കാര് നമ്മുടെ പേഴ്സണല് സ്പേസില് വന്ന് ഇടപെടുമ്പോള് എന്റെ സമാധാനമാണ് പോകുന്നത്. എന്നെ ഞാന് മനസിലാക്കിയിടത്തോളം എന്നെ ഞാന് സന്തോഷിപ്പിക്കുന്നിടത്തോളം വേറെ ഒരാള്ക്കും സന്തോഷിപ്പിക്കാൻ കഴിയില്ല. ഞാന് ഒരു കാര്യത്തിന് ഒരാളോട് അഭിപ്രായം ചോദിക്കുക, അവര് അതിന് ഒരു അഭിപ്രായം പറഞ്ഞാൽ, അത് അവരുടെതാണ്. എന്റെ അഭിപ്രായമല്ല.’- മഹിമ നമ്പ്യാര് പറഞ്ഞു.