കാർഡിഫിൽ നടക്കുന്ന പാകിസ്താനെതിരായ ടി20 പരമ്പരയിലെ മൂന്നാം മത്സരത്തിൽ ഇംഗ്ലണ്ട് നായകൻ ജോസ് ബട്ലർ കളിക്കില്ല. മത്സരത്തിന് മുന്നോടിയായി ബട്ലർ ടീം വിട്ടു. മൂന്നാമത്തെ കൺമണിയെ സ്വീകരിക്കാനുള്ള തയ്യാറെടുപ്പിലാണ് താരം. ഇതിന്റെ ഭാഗമായി പാകിസ്താനെതിരായ പരമ്പരയിൽ നിന്ന് ഇടവേളയെടുക്കുന്നുവെന്നാണ് അറിയിച്ചത്.
മൂന്നാം ടി20യിൽ മൊയീൻ അലിയാണ് ഇംഗ്ലണ്ട് ടീമിനെ നയിക്കുക. വ്യാഴാഴ്ച ഓവലിലാണ് നാലാം ടി20. പാകിസ്താനെതിരായ ടി20 പരമ്പരയിലെ 2-ാം മത്സരത്തിൽ 23 റൺസിന് ഇംഗ്ലണ്ട് ജയിച്ചിരുന്നു. ഇംഗ്ലണ്ട് ഉയർത്തിയ 184 റൺസ് വിജയലക്ഷ്യത്തിലേക്ക് ബാറ്റുവീശിയ പാകിസ്താൻ 160 റൺസിന് ഓൾ ഔട്ടാകുകയായിരുന്നു. നാല് മത്സരങ്ങളുള്ള പരമ്പരയിലെ ആദ്യ മത്സരം മഴമൂലം ഉപേക്ഷിച്ചിരുന്നു.
ലോകകപ്പിൽ, ഗ്രൂപ്പ് ബിയിൽ ഇംഗ്ലണ്ട്, ഓസ്‌ട്രേലിയ, നമീബിയ, സ്‌കോട്ട്‌ലൻഡ് എന്നീ ടീമുകൾക്ക് ഒപ്പമാണ് ഇംഗ്ലണ്ട്. ബാർബഡോസിൽ ജൂൺ 4ന് സ്‌കോട്ട്‌ലൻഡിനെതിരെയാണ് ടി20 ലോകകപ്പിലെ ഇംഗ്ലണ്ടിന്റെ ആദ്യ മത്സരം.
