കണ്ണൂർ: മൂല്യനിർണയം നടത്തിയ അദ്ധ്യാപകന്റെ പിഴവിൽ പത്താംക്ലാസ് വിദ്യാർത്ഥിക്ക് എ പ്ലസ് നഷ്ടമായി. കടന്നപ്പള്ളി സ്വദേശി ധ്യാൻ കൃഷ്ണയുടെ ഉത്തരക്കടലാസിന്റെ മൂല്യനിർണയത്തിൽ ആണ് അദ്ധ്യാപകന് പിഴവ് പറ്റിയതായി തെളിഞ്ഞത്. ഇതോടെ പുനർ മൂല്യനിർണയത്തിൽ മുഴുവൻ മാർക്കും ലഭിച്ച ധ്യാൻ കൃഷ്ണയ്‌ക്ക് എല്ലാ വിഷയങ്ങൾക്കും എ പ്ലസ് ലഭിക്കുകയായിരുന്നു. കടന്നപ്പള്ളി ജിഎച്ച്എസ്‌എസ്സിലെ വിദ്യാർത്ഥിയാണ് ധ്യാൻ കൃഷ്ണ.
മറ്റെല്ലാ വിഷയങ്ങൾക്കും എ പ്ലസ് ലഭിച്ച വിദ്യാർത്ഥിക്ക് ബയോളജിക്ക് മാത്രം എ ഗ്രേഡ് ലഭിക്കുകയായിരുന്നു. എന്നാൽ പൂർണ ആത്മവിശ്വാസത്തിലായിരിക്കുന്ന ധ്യാൻ പുനർ മൂല്യ നിർണയത്തിനും ഉത്തരക്കടലാസ് ലഭ്യമാക്കാനും അപേക്ഷ നൽകി. ഉത്തരക്കടലാസ് പരിശോധിച്ചപ്പോഴാണ് സ്കോർ ഷീറ്റിൽ മാർക്ക് രേഖപ്പെടുത്തിയതിൽ അദ്ധ്യാപകന് പിഴവ് സംഭവിച്ചതായി ബോധ്യപ്പെട്ടത്. സ്കോർ ഷീറ്റിൽ 23 ഉം 17 ഉം കൂട്ടി 30 എന്നാണ് അദ്ധ്യാപകൻ രേഖപ്പെടുത്തിയിരുന്നത്.
അദ്ധ്യാപകന്റെ കണക്ക് കൂട്ടൽ തെറ്റിയത് കണ്ടെത്തിയതോടെ പുനർ മൂല്യ നിർണയത്തിലൂടെ വിദ്യാർത്ഥിക്ക് മുഴുവൻ മാർക്കും ലഭിച്ചു. ഫുൾ എ പ്ലസ് എന്ന നേട്ടം നഷ്ടപ്പെടുത്താൻ ഇടയായ അദ്ധ്യാപകന്റെ പിഴവിനെതിരെ നിയമ നടപടി സ്വീകരിക്കുമെന്ന് വിദ്യാർത്ഥിയുടെ കുടുംബം പറഞ്ഞു.
