അച്ചാറിടാൻ മാത്രമല്ല! അടുക്കളയ്‌ക്ക് പുറത്തും വിനാ​ഗിരി താരമാണ്; ദേ ഈ ​ഗുണങ്ങൾ ഒരിക്കലെങ്കിലും അറിഞ്ഞിരിക്കണേ..

വീട്ടിൽ അച്ചാറിടാൻ അല്ലാതെ അമ്മമാർ വിനാ​ഗിരി കുപ്പി തുറക്കാറില്ല അല്ലേ. എന്നാൽ പാചകത്തിനും അടുക്കളയ്‌ക്കുമപ്പുറം വിനാ​ഗിരിയുടെ ഉപയോ​ഗങ്ങൾ നീണ്ടുകിടക്കുകയാണ്. ആദ്യമൊന്ന് ആശ്ചര്യപ്പെട്ടാലും സംഭവം സത്യമാണ്. വിനാ​ഗിരിയുടെ ചില ഉപയോ​ഗങ്ങൾ ഇതാ…

ക്ലീനിം​ഗ് സ്പ്രേ

വീട്ടിലെ ഉപകരണങ്ങൾ പൊടി പിടിച്ചും കറ പിടിച്ചും ഇരിക്കുകയാണോ? എന്നാൽ മടിക്കാതെ തന്നെ വിനാ​ഗിരിയെടുത്തോളൂ, ഒപ്പം അൽപം വെള്ളവും. വിനാ​ഗിരിയും വെള്ളവും തുല്യ അളവിലെടുത്ത് മിക്സ് ചെയ്ത് സ്പ്രേ കുപ്പിയിലാക്കി ഉപയോ​ഗിക്കാവുന്നതാണ്. ഇഴജന്തുക്കളെയും പ്രാണികളെയും തുരത്താനും വാതിലുകൾ വൃത്തിയാക്കാൻ വരെ ഉപയോ​ഗിക്കാവുന്നതാണ്. സു​ഗന്ധം ലഭിക്കുന്നതിനായി മണ്ണമുള്ള എണ്ണകളോ മറ്റോ ചേർക്കാവുന്നതാണ്. ​ഗ്രീസും മറ്റും വൃത്തിയാക്കാൻ ആണെങ്കിൽ നാരങ്ങ കൂടി ചേർക്കാവുന്നതാണ്.

മുടിയിലെ എണ്ണമയം അകറ്റാൻ

മുടിക്ക് എണ്ണമയം അനുഭവപ്പെടുകയാണെങ്കിൽ ആപ്പിൾ സിഡെർ വിനെ​ഗറും ഇരട്ടി വെള്ളവും ചേർക്കുക. ഈ മിശ്രിതം മുടിയിൽ പുരട്ടി ഷാംപൂ ചെയ്യുക. മൂന്ന് മിനിറ്റിന് ശേഷം കണ്ടീഷണർ ഉപയോ​ഗിച്ച് കഴുകി കളയുക.

കളനാശിനി

രാസ കീടനാശിനികളെ പടിക്ക് പുറത്താക്കാൻ വിനാ​ഗിരി ഉപകരിക്കും. കളകളുള്ള ഇടങ്ങളിൽ വിനാ​ഗിരിയും സോപ്പ് പൊടിയും ചേർത്ത് മിശ്രിതമുണ്ടാക്കി തളിക്കുക.

തുണി അലക്കുമ്പോൾ 

തുണി അലക്കുമ്പോള്‍ അല്പം വിനാഗിരി കൂടി ചേര്‍ക്കുന്നത് അഴുക്കും ദുര്‍ഗന്ധവുമകറ്റാനും തുണികളെ മൃദുവാക്കാനും സഹായിക്കും. വാഷിംഗ് മെഷീനുകളിലും ഉപയോഗിക്കാവുന്നതാണ്.

വളർത്തുമൃ​ഗങ്ങളുടെ ശരീരത്തിൽ നിന്ന് പ്രാണികളെ അകറ്റാൻ

വളർത്തുമൃ​ഗങ്ങളിൽ ഈച്ചയും പ്രാണിയുമൊക്കെ ശല്യമുണ്ടാക്കുന്നുണ്ടെങ്കിൽ വിനാ​ഗിരി പ്രതിവിധി നൽകും. വെള്ളവും വിനാ​ഗിരിയും തുല്യ അളവിലെടുക്കുക. വളർത്തുമൃ​ഗങ്ങളെ കുളിപ്പിച്ചതിന് ശേഷം ഈ മിശ്രിതം അവയുടെ രേമങ്ങളിൽ പുരട്ടുക. ചെള്ളിനെയും ഈച്ചയെയും അകറ്റാൻ ഇത് സഹായിക്കും.

സ്റ്റെയിൻലെസ്സ് സ്റ്റീൽ ഉപകരണങ്ങൾ വൃത്തിയാക്കാൻ

ഫ്രിഡ്ജ്, മൈക്രോവേവ് തുടങ്ങിയ സ്റ്റെയിൻലെസ് സ്റ്റീൽ ഉപകരണങ്ങൾ വൃത്തിയാക്കാനും വിനാ​ഗിരി സഹായിക്കും. വിനാ​ഗിരി തളിച്ച് പോളിഷിം​ഗ് തുണി ഉപയോ​ഗിച്ച് വൃത്തിയാക്കാവുന്നതാണ്.

കാർപ്പറ്റ് വൃത്തിയാക്കാൻ

കറ അകറ്റാനും ദുർ​ഗന്ധം അകറ്റാനും വിനാ​ഗിരി സഹായിക്കും. കറ ഉള്ളയിടത്ത് വിനാ​ഗിരി തളിച്ച് ബേക്കിം​ഗ് സോഡ വിതറുക. കുറച്ച് മിനിറ്റുകൾക്ക് ശേഷം തുടച്ച് നീക്കുക. ദുർ​ഗന്ധം അനുഭവപ്പെടുകയാണെങ്കിൽ നേരിയ തോതിൽ എണ്ണ ഉപയോ​ഗിക്കാം. സ്റ്റിക്കറുകളും മറ്റും ഭിത്തിയിൽ ഒട്ടിപ്പിടിച്ചിരിക്കുന്നുണ്ടെങ്കിൽ വിനാ​ഗിരി തേച്ച് പിടിപ്പിച്ച് അഞ്ച് മിനിറ്റിന് ശേഷം തുണി ഉപയോ​ഗിച്ച് തുടച്ചാൽ മതിയാകും.