ലണ്ടൻ: കാൻസർ രോഗനിർണയ ശേഷമുള്ള ആദ്യ പൊതു ചടങ്ങിൽ പങ്കെടുത്ത് ബ്രിട്ടീഷ് രാജകുടുംബാംഗമായ വെയിൽസ്‌ രാജകുമാരി കേറ്റ് മിഡിൽട്ടൺ. ബക്കിങ്ഹാം പാലസിൽ നടന്ന ട്രൂപ്പിങ് ദി കളർ പരേഡിലാണ് 42 കാരിയായ കേറ്റ് ഭർത്താവായ വില്യം രാജകുമാരനും കുട്ടികൾക്കുമൊപ്പം പങ്കെടുത്തത്.
ചാൾസ് മൂന്നാമൻ രാജാവിന്റെ ജന്മദിനത്തിന്റെ ഭാഗമായി നടന്ന പരേഡിലും പരമ്പരാഗത ഘോഷയാത്രയിലും പങ്കെടുക്കുന്ന രാജകുടുംബത്തോടൊപ്പമുള്ള കേറ്റ് രാജകുമാരിയുടെ ദൃശ്യങ്ങൾ മാദ്ധ്യമങ്ങൾ പുറത്തുവിട്ടു. നീണ്ട നാളുകൾക്ക് ശേഷം പൊതുവേദിയിൽ പ്രത്യക്ഷപ്പെട്ട കേറ്റിനെ കാണികൾ കരഘോഷത്തോടെയാണ് വരവേറ്റത്. കേറ്റിനൊപ്പം മക്കളായ ജോർജ് രാജകുമാരൻ, ഷാർലറ്റ് രാജകുമാരി, ലൂയിസ് രാജകുമാരൻ എന്നിവരും ഉണ്ടായിരുന്നു.
മാർച്ചിലാണ് തന്റെ കാൻസർ രോഗനിർണയ വിവരം കേറ്റ് രാജകുമാരി സാമൂഹിക മാദ്ധ്യമങ്ങളിലൂടെ പുറത്തുവിടുന്നത്. ഇതുമായി ബന്ധപ്പെട്ട ശസ്ത്രക്രിയയെ തുടർന്ന് അവർ 2 മാസത്തോളം പൊതുപരിപാടികളിൽ നിന്നും വിട്ടു നിന്നിരുന്നു. വില്യം രാജകുമാരൻ കുതിരപ്പുറത്തേറിയാണ് പരേഡിൽ പങ്കെടുത്തത്. അതേസമയം അർബുദത്തിന് ചികിത്സയിൽ കഴിയുന്ന ചാൾസ് രാജാവും കമീല രാഞ്ജിയോടൊപ്പം ചടങ്ങുകളിൽ പങ്കെടുത്തു.
