കണ്ണിനുചുറ്റുമുള്ള കറുപ്പുനിറം സ്ത്രീകളെയും പുരുഷന്മാരെയും ഒരുപോലെ ബാധിക്കുന്ന സൗന്ദര്യ പ്രശ്നമാണ്. ഉറക്കകുറവാണെന്നു കരുതി എത്ര ഉറങ്ങിയാലും ചർമ്മത്തെ പല രീതിയിൽ പരിപാലിച്ചാലുമൊന്നും അവ പെട്ടന്ന് അപ്രത്യക്ഷമാകാറുമില്ല. എന്നാൽ ഉറക്കക്കുറവും ക്ഷീണവും മാത്രമല്ല കൺതടങ്ങളിലെ കറുപ്പുനിറത്തിന് കാരണമായി മാറുന്നത്.
പാരമ്പര്യം, അലർജികൾ, വാർദ്ധക്യം, ശരിയല്ലാത്ത ഭക്ഷണ ശീലങ്ങൾ, എന്നിങ്ങനെ നിരവധി ഘടകങ്ങൾ കണ്ണിനുചുറ്റുമുള്ള കറുത്തനിറത്തിന് കാരണമാകാം. അമിതമായുള്ള സ്ക്രീൻ ടൈം കണ്ണുകളിലെ കറുത്തപാടുകൾക്ക് കരണമാകാറുണ്ട്. അവ നിങ്ങളെ കൂടുതൽ ക്ഷീണിതരും, രോഗിയും, വയസ് ഏറിയവരുമായി തോന്നിപ്പിക്കും. കൂടാതെ ആവശ്യത്തിനുള്ള ഉറക്കമില്ലായ്മ, അമിതമായി വെയിലേൽക്കുന്നത്, ചില വിറ്റാമിനുകളുടെ കുറവ് എന്നിവകൊണ്ടും കറുത്ത നിറം പ്രത്യക്ഷപ്പെടാം. വെള്ളം ആവശ്യത്തിന് കുടിക്കാതെയിരിക്കുമ്പോൾ നിർജ്ജലീകരണം സംഭവിക്കും. ഇതും കണ്ണിനുചുറ്റുമുള്ള കറുപ്പിന് കാരണമാണ്.
ഈയൊരു പ്രശനം മറികടക്കാനും ചർമ്മസംരക്ഷണത്തിനും ഇന്ന് നിരവധി ചികിത്സാ രീതികൾ നിലവിലുണ്ട്. ലേസർ തെറാപ്പി, ഡെർമൽ ഫില്ലറുകൾ, ബ്ലെഫറോപ്ലാസ്റ്റി, പ്ലേറ്റ്‌ലെറ്റ് അടങ്ങിയ പ്ലാസ്മ (പിആർപി) കുത്തിവയ്പ്പുകൾ എന്നിങ്ങനെയുള്ള ഫലപ്രദമായ ചികിത്സാരീതികൾ കൺതടങ്ങളിലെ കറുപ്പ് നിറം മാറ്റാൻ സഹായിക്കും.
ഇവ കൂടാതെ, SPF 50 മുതലുള്ള സൺസ്‌ക്രീൻ, കോൾഡ് കംപ്രസ്സുകൾ, കറ്റാർ വാഴ ജെൽ എന്നിവ ഉപയോഗിക്കുന്നത് കറുപ്പ് നിറം കുറഞ്ഞുവരാൻ സഹായിക്കും. പുരുഷന്മാരിൽ പുകവലി, മദ്യപാനം, പാരമ്പര്യം, കുറഞ്ഞ അളവിലുള്ള ഹീമോഗ്ലോബിൻ,തുടങ്ങിയവ കൊണ്ടും കണ്ണിനുചുറ്റും കറുപ്പ് നിറമുണ്ടാകാം.
ആർഗൻ ഓയിൽ ഉപയോഗിച്ച് കണ്ണുകൾക്ക് താഴെ മസാജ് ചെയ്യുക, നല്ല ജലാംശം നൽകുന്ന ഫേസ് മാസ്കുകൾ ഉപയോഗിക്കുക, നന്നായി ഉറങ്ങുക, തുടങ്ങിയ എളുപ്പവഴികളും ചർമ്മ സംരക്ഷണത്തിനായി പരീക്ഷിക്കാവുന്നതാണ്. ചർമ്മത്തിന്റെ ആരോഗ്യത്തിൽ മഗ്നീഷ്യം നിർണായക പങ്ക് വഹിക്കുന്നു, ഇത് കണ്ണുകൾക്ക് ചുറ്റുമുള്ള വീക്കവും കറുത്ത നിറവും കുറയ്‌ക്കാൻ സഹായിക്കും.
