കോഴിക്കോട്: കെഎസ്ആർടിസി ബസിൽ വച്ച് യുവതിക്ക് നേരെ ലൈംഗികാതിക്രമം. മാനന്തവാടിയിൽ നിന്നും കോഴിക്കോട് പോകുന്ന കെഎസ്ആർടിസി ബസിൽ വച്ചാണ് 23കാരിയായ യുവതിക്ക് നേരെ ലൈംഗികാതിക്രമം നടന്നത്. അതിക്രമം തുടർന്നതോടെ യുവതി ഇയാളെ മർദ്ദിച്ചു.
തിരക്കേറിയ ബസിൽ യാത്ര ചെയ്യവേ സമീപത്തുണ്ടായിരുന്നയാൾ യുവതിയ്ക്ക് നേരെ ലൈംഗികാതിക്രമം നടത്തുകയായിരുന്നു. ശല്യം സഹിക്കാനാവാതെ യുവതി ഇയാളെ അടിക്കുകയും വിവരം ബസിലെ കണ്ടക്ടറോടും ഡ്രൈവറോടും പറയുകയും ചെയ്തു. ഇതോടെ ഡ്രൈവർ പൊലീസിൽ വിവരം അറിയിക്കുകയായിരുന്നു.
പൊലീസ് വിവരങ്ങൾ അന്വേഷിച്ചെങ്കിലും യുവതി പരാതി നൽകാത്തതിനാൽ കേസെടുത്തില്ല. ശല്യം ചെയ്തയാൾക്കുള്ള ശിക്ഷ അപ്പോൾ തന്നെ നൽകിയതിനാലാണ് പരാതിപ്പെടാത്തത് എന്നായിരുന്നു യുവതിയുടെ മറുപടി.