”കരളേ നിൻ കൈ പിടിച്ചാൽ കടലോളം വെണ്ണിലാവ്..” മോഹൻലാൽ ചലച്ചിത്രം ദേവദൂതനിൽ മലയാളികൾക്ക് മറക്കാനാവാത്ത ഗാനങ്ങളിലൊന്നാണിത്. ഹൊററും പ്രണയവും ഒരുപോലെ ചാലിച്ച് 2000 ത്തിൽ സിബി മലയിലിന്റെ സംവിധാനത്തിൽ പുറത്തിറങ്ങിയ സിനിമയാണ് ദേവദൂതൻ. അക്കാലത്ത് സിനിമ മികച്ച കളക്ഷൻ നേടിയില്ലെങ്കിലും ഇപ്പോൾ ഒരു ഗംഭീര തിരിച്ചു വരവിനൊരുങ്ങുകയാണെന്നാണ് പുറത്തുവരുന്ന വിവരങ്ങൾ.
ഫോർ കെ മികവോടെയായിരിക്കും സിനിമ വീണ്ടും റീ-റിലീസിനെത്തുന്നത്. സിനിമയുടെ പുത്തൻ പോസ്റ്ററും നിർമാതാക്കളായ കോക്കേഴ്സ് മീഡിയ എന്റർടെയിൻമെന്റ്സ് പുറത്തുവിട്ടിട്ടുണ്ട്. പറന്നുയരുന്ന വെളുത്ത പ്രാവിനെ നോക്കി നിൽക്കുന്ന മോഹൻലാലിന്റെ ചിത്രമാണ് പോസ്റ്ററിലുള്ളത്.
View this post on Instagram
ചിത്രത്തിന്റെ കളർ കറക്ഷൻ ജോലികൾ പൂർത്തിയായ വിവരം അണിയപ്രവർത്തകർ നേരത്തെ തന്നെ പുറത്തുവിട്ടിരുന്നുവെങ്കിലും സിനിമയുടെ റീ റിലീസ് തീയതി പുറത്തുവിട്ടിട്ടില്ല. രഘുനാഥ് പലേരിയാണ് സിനിമയുടെ തിരക്കഥാകൃത്ത്.
വിശാൽ കൃഷ്ണമൂർത്തി എന്ന അനശ്വര കഥാപാത്രത്തെയാണ് മോഹൻലാൽ ചിത്രത്തിൽ അവതരിപ്പിച്ചത്. വിനീത് കുമാറിന്റെ മഹേശ്വർ എന്ന കഥാപാത്രവും ജയപ്രദയുടെ അലീന എന്ന കഥാപാത്രവും പ്രേക്ഷകരുടെ മനസിൽ ഇന്നും മായാത്ത നൊമ്പരമായി കിടക്കുന്നു. മുരളി, ശരത്, ജഗതി ശ്രീകുമാർ, വിജയ ലക്ഷ്മി, ലെന, രാധിക തുടങ്ങിയവരാണ് സിനിമയിലെ മറ്റ് പ്രധാന താരങ്ങൾ.