രക്ഷിത് ഷെട്ടിയുടെ നിർമാണത്തിൽ സന്ദീപ് പിഎസും സുമന്ത് ഭട്ടും ഒരുക്കുന്ന ‘ഏകം’ വെബ് സീരീസിന്റെ ടീസർ റിലീസ് ചെയ്തു. വ്യത്യസ്ത തരം മൊണ്ടാഷുകൾ കൂട്ടിച്ചേർത്ത് പ്രേക്ഷകനിൽ ആകാംക്ഷ ഉയർത്തുന്ന ടീസറാണ് അണിയറപ്രവർത്തകർ പുറത്തുവിട്ടിരിക്കുന്നത്.
‘ഏകത്തിന്റെ ലോകത്തിലേക്ക് നിങ്ങൾക്ക് സ്വാഗതം’ എന്ന അടിക്കുറിപ്പോടെയാണ് സീരിസിന്റെ ടീസർ പുറത്തുിവിട്ടത്. കന്നഡ സിനിമാ മേഖലയിൽ നിന്നും വെബ് സീരീസിലേക്കുള്ള ആദ്യ ചുവട് വയ്പ്പാണിത്. 8 എപ്പിസോഡുകളാണ് ഈ വെബ് സീരിസിനുള്ളത്.
കർണാടകയിലെ ഒരു ഗ്രാമത്തെ ചുറ്റിപ്പറ്റി നടക്കുന്ന കാര്യങ്ങളാണ് സിരീസിന്റെ ഇതിവൃത്തം. വ്യത്യസ്തമായ സംസ്‌കാരത്തിനും പാചകരീതിയ്‌ക്കും പേരുകേട്ട കർണാടകയിലെ തീരപ്രദേശത്തെ ജനജീവിതത്തിന്റെ കാഴ്ചകളാണ് സീരിസിൽ പറയുന്നത്. രാജ് ബി ഷെട്ടി, പ്രകാശ് രാജ് എന്നിവരാണ് ഏകത്തിലെ പ്രധാന താരങ്ങൾ. മിഥുൻ മുകുന്ദനാണ് സംഗീതം ഒരുക്കിയത്.
മറ്റ് ഒടിടി പ്ലാറ്റ്‌ഫോമുകളിൽ ഏകം റിലീസ് നടത്തില്ലെന്ന് സീരീസിന്റെ അണിയറപ്രവർത്തകർ അറിയിച്ചിരുന്നു. പകരം കന്നഡ വെബ് സീരിസിനായി പ്രത്യേകം പ്ലാറ്റ്‌ഫോം തയ്യാറാക്കിയിട്ടുണ്ടെന്നും ഇതിൽ റിലീസ് നടത്തുമെന്നുമാണ് അണിയറ പ്രവർത്തകർ പറയുന്നത്. റിലീസ് തീയതി പ്രഖ്യാപിച്ചിട്ടില്ല. ഭാഷയ്‌ക്കപ്പുറം സിനിമകളും കഥകളും ആസ്വദിക്കുന്ന ഏതൊരാൾക്കും 149 രൂപ മുടക്കിയാൽ ഏകത്തിന്റെ മുഴുവൻ എപ്പിസോഡികളും കാണാൻ സാധിക്കുമെന്ന് അണിയറ പ്രവർത്തകർ പറയുന്നു.
