ചായ പലർക്കും ഒരു വികാരമാണ്. ഒരു ദിവസം തുടങ്ങുന്നത് തന്നെ ചിലപ്പോൾ ചായ കുടിച്ചുകൊണ്ടായിരിക്കും. ഊർജസ്വലതയോടെ പ്രവർത്തിക്കാൻ ഇത് നമ്മെ സഹായിക്കുന്നു. എന്നാൽ എന്നും കുടിക്കുന്ന സമയത്ത് ചായ കിട്ടിയില്ലെങ്കിലോ? പലപ്പോഴും തലവേദനയും ക്ഷീണവുമെല്ലാം അനുഭവപ്പെട്ടെന്ന് വരാം. സാധാരണയായി മൺപാത്രങ്ങളിലും, സ്റ്റീൽ പാത്രങ്ങളിലുമൊക്കെയായിരിക്കും നാം ചായയുണ്ടാക്കുന്നത്. എന്നാൽ ഇതിൽ നിന്നും അൽപം വ്യത്യസ്തമായി ചിരട്ടയിൽ ചായയുണ്ടാക്കിയാലോ?
പരമ്പരാഗതമായി നിർമിച്ച അടുപ്പിൽ ചിരട്ട വച്ച് ചായയുണ്ടാക്കുന്ന യുവതിയാണ് ഇപ്പോൾ സമൂഹമാദ്ധ്യമങ്ങളിൽ ഇടംപിടിക്കുന്നത്. ചിരട്ടയിൽ അൽപം വെള്ളം ഒഴിച്ച് ചൂടായി വരുമ്പോൾ തേയില ചേർക്കുന്നു. ഇതിലേക്ക് അൽപം പഞ്ചസാരയും ഇഞ്ചി ചതച്ചതും ഒരു ഏലയ്ക്ക ചതച്ചതും കൂടി ഇട്ടു നൽകുന്നുണ്ട്. വെള്ളം തിളച്ചുവരുമ്പോൾ അൽപം പാൽ ചേർക്കുന്നു. ചെറിയ ചിരട്ടയിൽ മണ്ണടുപ്പിൽ വച്ചുണ്ടാക്കുന്ന ഈ ചായ തികച്ചും വ്യത്യസ്തമാണെന്നാണ് യുവതി പറയുന്നത്.
View this post on Instagram
ഇത്തരത്തിൽ ചായയുണ്ടാക്കി കുടിക്കുന്നത് ശരീരത്തിന് നല്ലതാണെന്നും എല്ലാവരും പരീക്ഷിച്ചു നോക്കണമെന്നും യുവതി പറയുന്നു. ഈസി കുക്കിംഗ് വിത്ത് കവിത എന്ന ഇൻസ്റ്റഗ്രാം പേജിലൂടെയാണ് യുവതി ചായയുണ്ടാക്കുന്ന വീഡിയോ പങ്കുവച്ചത്. മുത്തശ്ശിമാർ ഇത്തരത്തിൽ ചായയുണ്ടാക്കി തന്നിട്ടുണ്ടെന്നും ബാല്യകാലത്തെ ഓർമ്മകൾ ഉണർത്തുന്നതാണ് യുവതിയുടെ ഈ വീഡിയോ എന്ന കമ്മന്റും വീഡിയോയ്ക്ക് ലഭിച്ചിട്ടുണ്ട്.
