സൂപ്പർ 8-ൽ 4 പോയിന്റുമായി ഗ്രൂപ്പ് എയിലെ ഒന്നാം സ്ഥാനക്കാരാണ് ടീം ഇന്ത്യയെങ്കിലും സെമി ഫൈനലിന് യോഗ്യത നേടണമെങ്കിൽ കാര്യങ്ങൾ അത്ര എളുപ്പമല്ല. നാളെ ഓസ്ട്രേലിയക്കെതിരായ മത്സരം ജയിക്കുകയോ മഴ മൂലം മത്സരം ഉപേക്ഷിക്കുകയോ ചെയ്താൽ ഇന്ത്യക്ക് സെമി ഫൈനലിന് നേരിട്ട് യോഗ്യത നേടാം. എന്നാൽ സെമി ഫൈനൽ യോഗ്യത തല്ലിക്കെടുത്തുന്ന സാഹചര്യമാണ് നിലവിലുള്ളത്. ഇന്ത്യയെ ഓസ്ട്രേലിയയും ബംഗ്ലാദേശിനെ അഫ്ഗാനിസ്ഥാനും തോൽപ്പിച്ചാൽ മൂന്ന് ടീമുകൾക്കും നാല് പോയിന്റ് വീതമാകും. ഇതോടെ നെറ്റ് റൺറേറ്റാകും സെമി ഫൈനലിന് യോഗ്യത നേടുന്നവരെ തീരുമാനിക്കുക.
ഇന്ത്യ (4 പോയിന്റ്, 2 മത്സരങ്ങൾ; NRR +24)
നാളെ ഓസ്ട്രേലിയയെ തോൽപ്പിച്ചാൽ ഇന്ത്യ സെമി ഫൈനലിന് യോഗ്യത നേടും. ഇതോടെ അഫ്ഗാനിസ്ഥാൻ-ബംഗ്ലാദേശ് മത്സരം അപ്രസക്തമാകും. ഓസ്ട്രേലിയയും അഫ്ഗാനും വലിയ മാർജിനിൽ ജയിച്ചാൽ ഇന്ത്യക്ക് സെമി നഷ്ടമാകും. നെറ്റ് റൺ റേറ്റിൽ മുന്നിലെത്താൻ ഓസീസ് 41 റൺസിന് ഇന്ത്യയെ തോൽപ്പിക്കണം. ബംഗ്ലാദേശിനെതിരെ 83 റൺസിന് ജയിച്ചാൽ അഫ്ഗാനും നെറ്റ് റൺ റേറ്റിൽ മുന്നിലെത്താം. നാളെത്തെ മത്സരം മഴ മൂലം ഉപേക്ഷിച്ചാൽ അഞ്ച് പോയിന്റുമായി ഇന്ത്യ സെമി ഫൈനലിന് യോഗ്യത നേടും.
ഓസ്ട്രേലിയ (2 പോയിന്റ്, 2 മത്സരങ്ങൾ; NRR +0.22)
സെമി ഫൈനൽ സാധ്യത സജീവമാക്കണമെങ്കിൽ ഓസ്ട്രേലിയ നാളെത്തെ മത്സരത്തിൽ ഇന്ത്യയെ തോൽപ്പിക്കണം. അഫ്ഗാനിസ്ഥാനെ ബംഗ്ലാദേശും തോൽപ്പിച്ചാൽ ഓസീസിന് സെമിയിലേക്ക് യോഗ്യത നേടാം.
അഫ്ഗാനിസ്ഥാൻ (2 പോയിന്റ്, 2 മത്സരങ്ങൾ; NRR 0.65)
ഇന്ത്യയെ ഓസ്ട്രേലിയയും ബംഗ്ലാദേശിനെ അഫ്ഗാനിസ്ഥാനും തോൽപ്പിച്ചാൽ മൂന്ന് ടീമുകൾക്കും നാല് പോയിന്റ് വീതമാകും. അങ്ങനെയെങ്കിൽ നെറ്റ് റൺറേറ്റിന്റെ അടിസ്ഥാനത്തിലായിരിക്കും സെമി ഫൈനലിന് യോഗ്യത നേടുന്ന ടീമുകളെ തിരുമാനിക്കുക. നിലവിൽ അഫ്ഗാനിസ്ഥാനെയും ബംഗ്ലാദേശിനെയും അപേക്ഷിച്ച് ഓസീസിന് മികച്ച നെറ്റ് റൺ റേറ്റാണുള്ളത്. അങ്ങനെ സംഭവിച്ചാൽ ഓസീസും അഫ്ഗാനും സെമി ഫൈനലിന് യോഗ്യത നേടും.
ബംഗ്ലാദേശ് (0 പോയിന്റ്, 2 മത്സരങ്ങൾ; NRR -2.48)
പൂജ്യം പോയിന്റുള്ള ബംഗ്ലാദേശിന്റെ സെമി സാധ്യതകളും ഇതുവരെ അവസാനിച്ചിട്ടില്ല. നെറ്റ് റൺറേറ്റിൽ മുന്നിലെത്താൻ അഫ്ഗാനെതിരായ മത്സരത്തിൽ 31 റൺസിന് ജയിക്കുകയും ഓസ്ട്രേലിയ ഇന്ത്യയോട് 55 റൺസിന് പരാജയപ്പെടുകയും ചെയ്താൽ ബംഗ്ലാദേശിന് രണ്ടാമതെത്താം. അഫ്ഗാനെതിരായ മത്സരത്തിൽ തോറ്റാൽ ബംഗ്ലാദേശ് ടൂർണമെന്റിൽ നിന്ന് പുറത്താകും.