കോട്ടയം: ശക്തമായ മഴയും കാറ്റും വെള്ളപ്പൊക്കവും തുടരുന്ന സാഹചര്യത്തിൽ കോട്ടയം ജില്ലയിലെ വിദ്യാഭ്യാസ സ്ഥാപനങ്ങൾക്ക് കളക്ടർ അവധി പ്രഖ്യാപിച്ചു. അങ്കണവാടികളും പ്രൊഫഷണൽ കോളേജുകളും ഉൾപ്പെടെയുള്ള എല്ലാ വിദ്യഭ്യാസ സ്ഥാപനങ്ങൾക്കുമാണ് വെള്ളിയാഴ്ച അവധി പ്രഖ്യാപിച്ചിരിക്കുന്നതെന്നും എന്നാൽ തീയതികൾ പ്രഖ്യാപിച്ച പരീക്ഷകൾക്ക് മാറ്റമില്ലെന്നും കളക്ടർ വി. വിഗ്നനേശ്വരി അറിയിച്ചു.
മഴ ശക്തിപ്രാപിക്കുന്നതിനാൽ ആലപ്പുഴ ജില്ലയിലെ നാല് താലൂക്കുകളിലെ വിദ്യാഭ്യാസ സ്ഥാപനങ്ങൾക്കും ജില്ലാ കളക്ടർ അവധി പ്രഖ്യാപിച്ചിട്ടുണ്ട്. കുട്ടനാട്, അമ്പലപ്പുഴ, ചേർത്തല, ചെങ്ങന്നൂർ എന്നീ താലൂക്കുകളിലെ വിദ്യാഭ്യാസ സ്ഥാപനങ്ങൾക്കാണ് അവധി നൽകിയിരിക്കുന്നത്. അതേസമയം മുൻകൂട്ടി നിശ്ചയിച്ച പരീക്ഷകൾക്ക് മാറ്റമില്ലെന്നും ജില്ലാ കളക്ടർ അറിയിച്ചിരുന്നു.
കനത്ത മഴയിൽ മരങ്ങൾ കടപുഴകി വീഴുന്നതിനും മതിലുകൾ തകർന്നുവീഴുന്നതിനും സാധ്യതയുണ്ടന്നും പുറത്തേക്കിറങ്ങുന്നവർ ജാഗ്രത പാലിക്കണമെന്നും ദുരന്തനിവാരണ അതോറിറ്റി നിർദേശിച്ചു. അപകടകരമായ വിധത്തിൽ വീടിനോട് ചേർന്നുള്ള മരങ്ങൾ വെട്ടികളണമെന്നും നിർദേശത്തിൽ പറയുന്നു.