തിരുവനന്തപുരം: ബെംഗളൂരുവിലേക്കുള്ള പ്രതിദിന വിമാന സർവീസുകളുമായി എയർ ഇന്ത്യ. തിരുവനന്തപുരത്ത് നിന്നും ബെംഗളൂരുവിലേക്കും, ബെംഗളൂരുവിൽ നിന്ന് തിരുവനന്തപുരത്തേക്കുമുള്ള സർവീസുകൾ ജൂലൈ ഒന്നാം തീയതി മുതൽ ആരംഭിക്കുമെന്ന് അധികൃതർ അറിയിച്ചു. ഇൻഡിഗോ, വിസ്താര, എയർ ഇന്ത്യ എക്‌സ്പ്രസ് തുടങ്ങിയ വിമാനങ്ങളുടെ പ്രതിദിന സർവീസുകൾക്ക് പുറമെയാണ് എയർ ഇന്ത്യ പ്രതിദിന സർവീസുമായി എത്തിയിരിക്കുന്നത്.
AI 567, AI 568 എന്നീ വിമാനങ്ങളായിരിക്കും സർവീസുകൾ നടത്തുക. എല്ലാ ദിവസവും വൈകിട്ട് മൂന്ന് മണിക്ക് ബെംഗളൂരുവിൽ നിന്ന് പുറപ്പെടുന്ന AI567 വിമാനം തിരുവനന്തപുരത്ത് 4.15ന് എത്തും. വൈകിട്ട് 4.55നാണ് തിരുവനന്തപുരത്ത് നിന്ന് ബെംഗളൂരുവിലേക്കുള്ള വിമാനം പുറപ്പെടുന്നത്. 6.10ന് ഈ വിമാനം ബെംഗളൂരുവിൽ എത്തും.
ഇതിനുപുറമെ തിരുവനന്തപുരം വിമാനത്താവളത്തിൽ വന്നിറങ്ങുന്നവർക്ക് യൂസർ ഫീ നിരക്കും വർദ്ധിക്കും. ജൂലൈ മുതൽ ആഭ്യന്തര യാത്രക്കാർ 506 രൂപ നൽകുന്നതിന് പകരം 770 രൂപ നൽകേണ്ടി വരും. വിദേശ യാത്രികർക്കുള്ള യൂസർ ഫീ 1069 രൂപയിൽ നിന്ന് 1540 രൂപ ആയും ഉയർത്തിട്ടുണ്ട്.
