ശ്രദ്ധിക്കുക: പൊതുഫലങ്ങൾ ഒരു നിശ്ചിത കാലയളവിലെ ഗ്രഹനിലയെ അടിസ്ഥാനമാക്കിയുള്ള പ്രവചനങ്ങളാണ്. എന്നാൽ, ഓരോ വ്യക്തിയും അനുഭവിക്കുന്ന യഥാർത്ഥ ഫലങ്ങൾ ജനന സമയത്തെ ഗ്രഹനില, അതിൽ നിന്നുണ്ടാകുന്ന യോഗങ്ങൾ, നിലവിലെ ദശ, അപഹാരങ്ങൾ എന്നിവയെ ആശ്രയിച്ചിരിക്കും. എന്നിരുന്നാലും, ഈ പൊതുഫലങ്ങളെ ഒരു സൂചനയായി ഉപയോഗിച്ച്, വിശദമായ ജാതക വിശകലനം നടത്തി ദശാനാഥനെ പ്രീതിപ്പെടുത്താനുള്ള വഴികൾ തേടുകയും ദോഷപരിഹാരങ്ങൾ ചെയ്യുകയും ചെയ്താൽ, നല്ല സമയങ്ങളുടെ ഗുണഫലങ്ങൾ പരമാവധി അനുഭവിക്കാനും പ്രതികൂല സമയങ്ങളെ കൂടുതൽ എളുപ്പത്തിൽ തരണം ചെയ്യാനും സാധിക്കും.
ഓരോ രാശിക്കാർക്കും ക്ഷേത്ര ദർശനത്തിനു വിശേഷമായ പക്കപ്പിറന്നാൾ ദിനങ്ങൾ അറിയാൻ അതാത് വാര/മാസ ഫലങ്ങൾ ശ്രദ്ധിക്കുക.
ഇതും വായിക്കുക
ശനിയുടെ വക്രഗതി നിങ്ങൾക്കെങ്ങനെ ? ഭാഗം 1
ധനു രാശി: (മൂലം, പൂരാടം, ഉത്രാടം ആദ്യ 1/4 ഭാഗം)
ജൂൺ മാസാവസാനത്തോടെ ശനിദേവൻ വക്രഗതിയിലേക്ക് പ്രവേശിക്കുന്നത് ധനു രാശിക്കാർക്ക് ജീവിതത്തിൽ ചില വെല്ലുവിളികൾക്ക് വഴിതുറന്നേക്കാം. എന്നാൽ, ഈ വെല്ലുവിളികളെ വളർച്ചയ്‌ക്കും പുരോഗതിക്കുമുള്ള പടവുകളായി കണ്ട് കഠിനാധ്വാനത്തിലൂടെയും സ്ഥിരോത്സാഹത്തിലൂടെയും വൻ വിജയങ്ങൾ കൈവരിക്കാൻ ശ്രമിക്കുക. മാനസികമായി പാകപ്പെടാൻ സഹായിക്കുന്ന പല പരീക്ഷണങ്ങളും നേരിടേണ്ടി വന്നേക്കാം.
അടുത്ത നാല് മാസക്കാലം കുടുംബാംഗങ്ങളിൽ നിന്നും ബന്ധുക്കളിൽ നിന്നും ഒരു അകൽച്ച അനുഭവപ്പെടാം. ഈ സമയത്ത് തെറ്റിദ്ധാരണകൾ ഉടലെടുക്കാതെ പ്രത്യേകം ശ്രദ്ധിക്കുക. വ്യക്തമായ ആശയവിനിമയത്തിന്റെ അഭാവം ചിലപ്പോൾ വലിയ പ്രശ്നങ്ങൾക്ക് വഴിവെച്ചേക്കാം. ക്ഷമയും സഹാനുഭൂതിയും കൈവിടാതെ, ചിലപ്പോൾ മൗനം പാലിക്കുന്നതാണ് ഉചിതം. വിവേകത്തോടെ പ്രവർത്തിക്കുക എന്നതാണ് ഈ സമയത്തെ മുഖ്യമന്ത്രം.
എന്നാൽ, ഈ കാലയളവിൽ അപ്രതീക്ഷിതമായ ധനാഗമനത്തിനുള്ള സാധ്യതയുമുണ്ട്. ഈ സാമ്പത്തിക നേട്ടം പരമാവധി പ്രയോജനപ്പെടുത്തണമെങ്കിൽ ചെലവുകൾ നിയന്ത്രിക്കേണ്ടത് അനിവാര്യമാണ്. ധൂർത്തും ആഡംബരവും ഈ നാലു മാസത്തേക്ക് പാടെ മാറ്റിവയ്‌ക്കുന്നതാണ് ഉചിതം.
അമ്മയുമായുള്ള ബന്ധം ശക്തിപ്പെടുത്താനും അവരുടെ പിന്തുണ നേടാനും ഈ സമയം ശ്രദ്ധിക്കുന്നത് ഗുണം ചെയ്യും. സ്വന്തമായി ഭൂമിയോ വീടോ സ്വന്തമാക്കാനുള്ള നിങ്ങളുടെ സ്വപ്നം യാഥാർത്ഥ്യമായേക്കാം. അല്ലെങ്കിൽ നിലവിലുള്ള വീടിന്റെ നവീകരണത്തിനുള്ള സാധ്യതയും തള്ളിക്കളയാനാവില്ല. വസ്തു വാങ്ങൽ ഉദ്ദേശിക്കുന്നുവെങ്കിൽ ഈ നാലു മാസത്തിനുള്ളിൽ വാങ്ങുന്നത് അനുകൂലമായിരിക്കും.
മുൻകാല ബന്ധങ്ങളിലെ തിരിച്ചടികളിൽ നിന്ന് പാഠം ഉൾക്കൊണ്ട് ജീവിതത്തിലെ യാഥാർത്ഥ്യങ്ങൾ മനസ്സിലാക്കാൻ ശനിദേവൻ നിങ്ങളെ പ്രാപ്തനാക്കും. പ്രത്യേകിച്ച്, ജീവിതപങ്കാളിയുടെയും സുഹൃത്തുക്കളുടെയും യഥാർത്ഥ സ്വഭാവം തിരിച്ചറിയാനും അവരുമായുള്ള ബന്ധങ്ങളെ കൂടുതൽ അർത്ഥവത്താക്കാനും ഈ സമയം പ്രയോജനപ്പെടുത്താം.
ജന്മഗ്രഹ നിലയിൽ കുടുംബസ്ഥാനത്ത് ശനി നിൽക്കുന്നുണ്ടെങ്കിൽ, മാതാവിന് രോഗാവസ്ഥയോ അരിഷ്ടതയോ ഉണ്ടാകാനുള്ള സാധ്യതയുണ്ട്. ശനിയുടെ ഭാവം നോക്കി ഉചിതമായ പരിഹാരങ്ങൾ ചെയ്യുന്നത് ഈ പ്രതിസന്ധികളെ തരണം ചെയ്യാൻ സഹായിക്കും.
ധനുക്കൂറിലുള്ള മൂലം, പൂരാടം, ഉത്രാടം നക്ഷത്രക്കാർ ഈ വരുന്ന നാലു മാസക്കാലം ചതുർബാഹുവായ മഹാവിഷ്ണുവിനെ തൊഴുന്നത് ശനിയുടെ ആനുകൂല്യം ലഭിക്കാൻ സഹായിക്കും (ജാതകത്തിൽ മറ്റു ഗുരുതര പ്രശ്നങ്ങൾ ഇല്ലാത്തവർക്ക്). ഇതിനു പുറമെ, പക്കപ്പിറന്നാൾ, അനുജന്മനക്ഷത്ര ദിവസങ്ങളിൽ അടുത്തുള്ള ക്ഷേത്രത്തിൽ തൊഴുന്നതും കഴിയുന്ന പോലെ ദീപം, അലങ്കാരം, നേദ്യം എന്നിവ സമർപ്പിക്കുന്നതും നല്ലതാണ്.
മകരം രാശി: (ഉത്രാടം അവസാന 3/4 ഭാഗം, തിരുവോണം, ആദ്യ അവിട്ടം 1/2 ഭാഗം)
ജൂൺ മാസാവസാനത്തോടെ ശനിദേവൻ വക്രഗതിയിലാകുന്നത് ജീവിതത്തിൽ ചില മാറ്റങ്ങൾക്ക് വഴിയൊരുക്കും. ഈ സമയം സാമ്പത്തിക രംഗത്ത് അനുകൂലമായ ചില മാറ്റങ്ങൾ പ്രതീക്ഷിക്കാം. ചിട്ടിയിലോ നറുക്കെടുപ്പിലോ നിക്ഷേപങ്ങളിൽ നിന്നും അപ്രതീക്ഷിത ധനലാഭം ലഭിക്കാൻ സാധ്യതയുണ്ട്.
ശനി വക്രഗതി സാമ്പത്തിക നേട്ടങ്ങൾ മാത്രമല്ല, ആശയവിനിമയ രീതികൾ പുനഃപരിശോധിക്കാനും മറ്റുള്ളവരുമായുള്ള ഇടപെടലുകളിൽ കൂടുതൽ ശ്രദ്ധ ചെലുത്താനും പ്രേരിപ്പിക്കും. മുൻപ് വാക്കുകൾ കൊണ്ട് നഷ്ടപ്പെട്ട അവസരങ്ങൾ വീണ്ടെടുക്കാനും ബന്ധങ്ങളിൽ കൂടുതൽ പക്വത കൈവരിക്കാനും ഈ സമയം സഹായകമാകും.
മാധ്യമം, സിനിമ, രാഷ്‌ട്രീയം, ഡിജിറ്റൽ മാർക്കറ്റിംഗ് മേഖലകളിൽ പ്രവർത്തിക്കുന്നവർ ഈ സമയം കൂടുതൽ ജാഗ്രത പുലർത്തണം. അനാവശ്യ വിവാദങ്ങൾ ഒഴിവാക്കാനും സോഷ്യൽ മീഡിയയിൽ കൂടുതൽ ശ്രദ്ധ ചെലുത്താനും ശ്രമിക്കുക. അവിഹിത ബന്ധങ്ങളിൽ ഏർപ്പെട്ടിരിക്കുന്നവർക്ക് ഈ സമയം ബന്ധങ്ങളിൽ വിള്ളലുകൾ ഉണ്ടാകാൻ സാധ്യതയുണ്ട്.
എന്നിരുന്നാലും, ഈ സമയം വ്യക്തിപരമായ വളർച്ചയ്‌ക്കും പക്വതയ്‌ക്കും വഴിയൊരുക്കും. ലക്ഷ്യബോധം വർധിക്കുകയും ധനകാര്യങ്ങളിൽ കൂടുതൽ ഉത്തരവാദിത്തബോധം വളർത്തുകയും ചെയ്യും. കുടുംബാംഗങ്ങളുമായും സുഹൃത്തുക്കളുമായും ഉള്ള ബന്ധങ്ങൾ ശക്തിപ്പെടുത്താനും ഈ സമയം അനുകൂലമാണ്.
ജന്മഗ്രഹ നിലയിൽ ചന്ദ്രൻ നിൽക്കുന്ന ഭാവത്തിന് അനുസരിച്ച് ഉചിതമായ പരിഹാരങ്ങൾ ചെയ്യുന്നത് ഈ സമയത്തെ ഭാഗ്യാനുഭവങ്ങൾ വർദ്ധിപ്പിക്കും. ഈ ശനി വക്രഗതി ജീവിതത്തിൽ പുതിയ അധ്യായങ്ങൾ തുറക്കാനുള്ള അവസരമായി കാണുക.
ഈ വരുന്ന നാലു മാസക്കാലം മകരകൂറിലുള്ള ഉത്രാടം, തിരുവോണം, അവിട്ടം നക്ഷത്രക്കാർ തിങ്കളാഴ്ചകളിൽ മഹാദേവനെ നിർമാല്യം കണ്ടു വണങ്ങുന്നതും ശുദ്ധമായ നല്ലെണ്ണ ദാനം ചെയ്യുന്നതും, ജാതകത്തിൽ മറ്റു ഗുരുതര പ്രശ്നങ്ങൾ ഇല്ലാത്തവർക്ക് ജീവിതത്തിൽ ഉയർച്ചയ്‌ക്ക് കാരണമാകും. ഇതിനു പുറമെ, പക്കപ്പിറന്നാൾ, അനുജന്മനക്ഷത്ര ദിവസങ്ങളിൽ അടുത്തുള്ള ക്ഷേത്രത്തിൽ തൊഴുന്നതും കഴിയുന്നതനുസരിച്ച് ദീപം, അലങ്കാരം, നേദ്യം എന്നിവ സമർപ്പിക്കുന്നതും നല്ലതാണ്.
കുംഭം രാശി: (അവിട്ടം അവസാന 1/2 ഭാഗം, ചതയം, പൂരൂരുട്ടാതി ആദ്യ 3/4 ഭാഗം)
ജൂൺ മാസാവസാനത്തോടെ ശനിദേവൻ വക്രഗതിയിലേക്ക് പ്രവേശിക്കുന്നത് ജീവിതത്തിൽ ചില പ്രധാനപ്പെട്ട മാറ്റങ്ങൾക്ക് വഴിയൊരുക്കുന്നു. ഈ സമയം ചില വെല്ലുവിളികൾ നേരിടേണ്ടി വന്നേക്കാമെങ്കിലും, അവയെ അതിജീവിക്കാനും ലക്ഷ്യങ്ങളിൽ എത്തിച്ചേരാനുമുള്ള ശക്തിയും കഴിവും ശനി ഭഗവാൻ നൽകും.
അടുത്ത നാല് മാസക്കാലം മോഷണശ്രമങ്ങളും സ്ഥാനചലനങ്ങളും ഉണ്ടാകാൻ സാധ്യതയുള്ളതിനാൽ, വീടും വസ്തുവകകളും സുരക്ഷിതമായി സൂക്ഷിക്കുന്നതിൽ പ്രത്യേകം ശ്രദ്ധിക്കേണ്ടതാണ്. ഈ സമയം അനാവശ്യമായ കോപവും ആലോചനയില്ലാത്ത പ്രവൃത്തികളും ഒഴിവാക്കാൻ ശ്രമിക്കുക, കാരണം ഇവ ജീവിതത്തിൽ ദോഷാനുഭവങ്ങൾക്ക് കാരണമായേക്കാം.
എന്നിരുന്നാലും, ഈ ശനി വക്രഗതി കുടുംബ ബന്ധങ്ങളുടെ മൂല്യം പഠിപ്പിക്കുന്ന ഒരു സമയം കൂടിയാണ്. ഈ സമയം കുടുംബാംഗങ്ങളുമായി കൂടുതൽ സമയം ചെലവഴിക്കാനും അവരുമായുള്ള ബന്ധം ശക്തിപ്പെടുത്താനും ശ്രമിക്കുക.
റിയൽ എസ്റ്റേറ്റ് മേഖലയിൽ പ്രവർത്തിക്കുന്നവർക്ക് ഈ സമയം മികച്ച നിക്ഷേപ അവസരങ്ങൾ വന്നുചേരും. പുതിയ സ്വത്തുക്കൾ സ്വന്തമാക്കാനും പുതിയ വരുമാന സ്രോതസ്സുകൾ കണ്ടെത്താനും സാധിക്കും. ഓഹരി വിപണിയിലും നിക്ഷേപം നടത്തി വൻ ലാഭം നേടാനുള്ള അവസരങ്ങളും ഈ സമയം പ്രതീക്ഷിക്കാം.
സന്താനങ്ങളുടെ കാര്യത്തിൽ ഉണ്ടായിരുന്ന ഉത്കണ്ഠകൾക്ക് അറുതി വരുന്ന ഒരു സമയം കൂടിയാണിത്. അവരുടെ വളർച്ചയിൽ അഭിമാനം തോന്നുന്ന നിമിഷങ്ങൾ ഉണ്ടാകും.
ജന്മഗ്രഹ നിലയിൽ വ്യാഴം, ശുക്രൻ എന്നിവയുടെ സ്ഥാനം അനുസരിച്ച് ഉചിതമായ പരിഹാരങ്ങൾ ചെയ്യുന്നത് മാനസികമായും സാമ്പത്തികമായും ഉള്ള പ്രശ്നങ്ങൾ ലഘൂകരിക്കാൻ സഹായിക്കും.
ഈ ശനി വക്രഗതി ജീവിതത്തിൽ പല മാറ്റങ്ങൾക്കും കാരണമാകുമെങ്കിലും, ശരിയായ മനോഭാവത്തോടെയും ശ്രദ്ധയോടെയും ഈ സമയത്തെ മികച്ച രീതിയിൽ ഉപയോഗപ്പെടുത്തുകയാണെങ്കിൽ, ലക്ഷ്യങ്ങളിൽ എത്തിച്ചേരാനും സന്തോഷകരമായ ഒരു ജീവിതം നയിക്കാനും സാധിക്കും.
ഈ വരുന്ന നാലു മാസക്കാലം കുംഭകൂറിലുള്ള അവിട്ടം, ചതയം, പൂരുരുട്ടാതി നക്ഷത്രക്കാർ ശനിയാഴ്ച ദിവസങ്ങളിൽ ശാസ്താവിന്റെ ക്ഷേത്രത്തിൽ കറുത്ത വസ്ത്രം ധരിച്ച് അയ്യപ്പ സ്വാമിയെ നിർമ്മാല്യം കണ്ട് വണങ്ങുന്നതും ശുദ്ധമായ നെയ്യ് ദാനം ചെയ്യുന്നതും, ജാതകത്തിൽ മറ്റു ഗുരുതര പ്രശ്നങ്ങൾ ഇല്ലാത്തവർക്ക് ജീവിതത്തിൽ ഉയർച്ചയ്‌ക്ക് കാരണമാകും. ഇതിനു പുറമെ, പക്കപ്പിറന്നാൾ, അനുജന്മ നക്ഷത്ര ദിവസങ്ങളിൽ അടുത്തുള്ള ക്ഷേത്രത്തിൽ തൊഴുന്നതും കഴിയുന്നതനുസരിച്ച് ദീപം, അലങ്കാരം, നേദ്യം എന്നിവ സമർപ്പിക്കുന്നതും നല്ലതാണ്. വാര/മാസ ഫലങ്ങളിൽ ക്ഷേത്ര ദർശനത്തിന് അനുയോജ്യമായ പിറന്നാൾ ദിവസങ്ങൾ സൂചിപ്പിക്കുന്നത് ശ്രദ്ധിക്കുക.
മീനം രാശി: (പൂരൂരുട്ടാതി അവസാന 1/4 ഭാഗം, ഉതൃട്ടാതി, രേവതി)
ജൂൺ മാസാവസാനത്തോടെ ശനിദേവൻ വക്രഗതിയിലേക്ക് പ്രവേശിക്കുന്നത് തൊഴിൽ മേഖലയിൽ അഭിവൃദ്ധിയുടെയും അംഗീകാരത്തിന്റെയും പുതിയ വാതായനങ്ങൾ തുറക്കുന്നു. ഈ കാലയളവിൽ, കഠിനാധ്വാനത്തിന്റെ ഫലം നിങ്ങൾക്ക് ലഭിക്കുകയും സമൂഹത്തിൽ മാന്യതയും അംഗീകാരവും നേടാൻ സാധിക്കുകയും ചെയ്യും. പ്രത്യേകിച്ച്, റിയൽ എസ്റ്റേറ്റ് മേഖലയിൽ പ്രവർത്തിക്കുന്നവർക്ക് അപ്രതീക്ഷിത ധനലാഭത്തിനുള്ള സാധ്യതകൾ ഈ സമയം തുറന്നു വരുന്നു. പുതിയ നിക്ഷേപങ്ങൾക്കോ നിലവിലുള്ളവ വിപുലീകരിക്കുന്നതിനോ അനുകൂലമായ സമയമാണിത്.
ശനിയുടെ വക്രഗതി വെറും ഭൗതിക നേട്ടങ്ങൾ മാത്രമല്ല, ആന്തരികമായ പരിവർത്തനത്തിനും വഴിയൊരുക്കുന്നു. ജീവിതത്തിലെ നെഗറ്റീവ് ചിന്തകളെ പോസിറ്റീവ് ഊർജ്ജമാക്കി മാറ്റാനും, കഴിവുകൾ തിരിച്ചറിഞ്ഞ് ലോകത്തിന് പകർന്നു നൽകാനുമുള്ള സുവർണ്ണാവസരമായി ഈ സമയത്തെ കാണാം. ഉള്ളിലെ കലാകാരനെ പുറത്തു കൊണ്ടുവരാനോ, പുതിയ കഴിവുകൾ പഠിക്കാനോ, മറ്റുള്ളവരെ പഠിപ്പിക്കാനോ അനുകൂല സമയം. ആത്മീയതയിലേക്കുള്ള അന്വേഷണങ്ങളും ഈ കാലയളവിൽ ശക്തി പ്രാപിക്കുകയും മുൻകാല തെറ്റുകളിൽ നിന്ന് പാഠങ്ങൾ ഉൾക്കൊണ്ട് തിരിച്ചുവരവിനുള്ള വഴി തെളിയുകയും ചെയ്യും.
രാഷ്‌ട്രീയ, സിനിമാ മേഖലകളിൽ പ്രവർത്തിക്കുന്നവർക്ക് ചില തടസ്സങ്ങളും വെല്ലുവിളികളും നേരിടേണ്ടി വന്നേക്കാം. എന്നാൽ ശനിയുടെ അനുഗ്രഹത്താൽ ഈ പ്രതിസന്ധികളെ അതിജീവിക്കാനുള്ള കരുത്ത് നിങ്ങൾക്കുണ്ടാകും. വിമർശനങ്ങളെയും എതിർപ്പുകളെയും ക്രിയാത്മകമായി സ്വീകരിക്കാനും, ലക്ഷ്യത്തിൽ നിന്ന് വ്യതിചലിക്കാതിരിക്കാനും ഈ സമയം ശ്രദ്ധിക്കുക. ജന്മഗ്രഹ നിലയിൽ സൂര്യൻ, ബുധൻ, ശുക്രൻ എന്നിവരുടെ ദശാകാലം നടക്കുന്നവർ ജാതകത്തിലെ ഗ്രഹനില അനുസരിച്ച് ഉചിതമായ പരിഹാരങ്ങൾ ചെയ്യുന്നത് ശനിയുടെ വക്രഗതിയുടെ ഫലങ്ങൾ കൂടുതൽ അനുകൂലമാക്കാൻ സഹായിക്കും. ഈ സമയത്തെ ഊർജ്ജത്തെ പ്രയോജനപ്പെടുത്തി ജീവിതത്തിൽ പുരോഗതിയും സന്തോഷവും കൈവരിക്കാൻ ശ്രമിക്കുക.
മീനക്കൂറിലുള്ള പൂരുരുട്ടാതി, ഉത്രട്ടാതി, രേവതി നക്ഷത്രക്കാർ ഈ വരുന്ന നാലു മാസക്കാലം കുടുംബ ക്ഷേത്രത്തിൽ ആചാരപ്രകാരം തൊഴുത് പിടിപ്പണം വാരി നടയിൽ സമർപ്പിക്കുന്നതും അവിടുത്തെ നിത്യ ചിലവുകൾക്ക് വേണ്ടിയുള്ള ദ്രവ്യങ്ങൾ സമർപ്പിക്കുന്നതും ക്ഷേത്ര കാര്യങ്ങൾ നോക്കുന്ന ആചാര്യനെ യഥാവിധി ആദരിക്കുന്നതും, ജാതകത്തിൽ മറ്റു ഗുരുതര പ്രശ്നങ്ങൾ ഇല്ലാത്തവർക്ക് ജീവിതത്തിൽ വലിയ സന്തോഷങ്ങൾക്ക് കാരണമാകും. ഇതിനു പുറമേ, പക്കപ്പിറന്നാൾ, അനുജന്മ നക്ഷത്ര ദിവസങ്ങളിൽ അടുത്തുള്ള ക്ഷേത്രത്തിൽ തൊഴുന്നതും കഴിയുന്നതനുസരിച്ച് ദീപം, അലങ്കാരം, നേദ്യം എന്നിവ സമർപ്പിക്കുന്നതും നല്ലതാണ്.
ജയറാണി ഈ വി .
WhatsApp No : 9746812212
(പാരമ്പര്യ ജ്യോതിഷ കുടുംബത്തിലെ അംഗം . ഇരുപതിലേറെ വർഷമായി ജ്യോതിഷം സംഖ്യാശാസ്ത്രം വാസ്തു ആചാര അനുഷ്ഠാന വിഷയങ്ങൾ കൈകാര്യം ചെയ്യുന്നു)
Saturn Retrograde 2024 Prediction by Jayarani E.V
