ആവശ്യത്തിനും അനാവശ്യത്തിനും ചിരിക്കുന്നവർ നമുക്കിടയിലുണ്ട്, എന്നാൽ പൊതു സ്ഥലങ്ങളിലും ആൾക്കൂട്ടങ്ങൾക്കിടയിലും ചിരി കടിച്ചമർത്തി മാന്യത പാലിക്കാൻ ശീലിച്ചവരുമുണ്ട്. പ്രിയപ്പെട്ടവർക്കൊപ്പമുള്ള തമാശകളും ചിരികളും നമ്മെ കൂടുതൽ ഉന്മേഷമുള്ളവരാക്കുമെങ്കിലും പൊട്ടിച്ചിരിക്കുന്നവർക്ക് മാത്രം ലഭിക്കുന്ന അവർ പോലും അറിയാതെ പോകുന്ന ചില ആരോഗ്യകരമായ നേട്ടങ്ങൾ ഇവയാണ്:
1. അവയവങ്ങളുടെ പ്രവർത്തനക്ഷമത കൂട്ടുന്നു
ഒരുതവണ ചിരിക്കുമ്പോഴും ഓക്സിജന്റെ അളവ് കൂടിയ വായു നമ്മൾ ഉച്ഛ്വസിക്കുന്നുണ്ട്. ഇത് ഹൃദയം, ശ്വാസകോശം, പേശികൾ എന്നിവയുടെ പ്രവർത്തനം ത്വരിതഗതിയിലാക്കുന്നു. മാനസികാവസ്ഥയെ മെച്ചപ്പെടുത്തുന്ന എൻഡോർഫിൻ ഹോർമോണുകളുടെ ഉത്പാദനത്തിനും ചിരിക്കുന്നത് സഹായകമാകും.
2. സമ്മർദ്ദം കുറയ്ക്കുന്നു
നമുക്ക് സമ്മർദ്ദവും ഉത്കണ്ഠയും അനുഭവപ്പെടുന്ന സാഹചര്യങ്ങളിൽ ചിരിക്ക് വളരെ വലിയ പങ്കുണ്ട്. ഇത് ഹൃദയമിടിപ്പും രക്തസമ്മർദ്ദവും നിയന്ത്രിക്കുന്നതിലൂടെ സമ്മർദ്ദം കുറയ്ക്കാൻ സഹായിക്കും. പതിയെ ശാന്തമായ മാനസിക അവസ്ഥയിലേക്ക് മടങ്ങിവരാൻ സാധിക്കും.
3. ടെൻഷൻ ഇല്ലാതാക്കുന്നു
പ്രിയപ്പെട്ടവരുമായി കളി തമാശകൾ പറഞ്ഞു ചിരിക്കുന്നത് രക്ത ചംക്രമണം ഉത്തേജിപ്പിക്കുന്നതിനും സമ്മർദ്ദത്തിലായിരിക്കുന്ന പേശികളെ വിശ്രമാവസ്ഥയിലേക്ക് നയിക്കുന്നതിനും സഹായിക്കും.
4. പ്രതിരോധശേഷി വർധിപ്പിക്കുന്നു
മനസ്സിൽ ആവശ്യത്തിലധികം നെഗറ്റിവ് ചിന്തകൾ നിറയുമ്പോൾ അത് ശരീരത്തിന്റെ പ്രതിരോധ ശേഷിയെയും ബാധിക്കും. അതെ സമയം ചിരി പോസിറ്റീവ് ചിന്തകളിലേക്കുള്ള പാലമാണ്. ഇത് ശരീരത്തിൽ ന്യൂറോപെപ്റ്റൈഡുകൾ കൂടുതലായി ഉത്പാദിപ്പിക്കുന്നു. ഇവ പ്രതിരോധ ശേഷി വർധിപ്പിക്കാൻ സഹായിക്കും.
5. മാനസികവും ശാരീരികവുമായ വേദനകൾ കുറയ്ക്കുന്നു
സ്വാഭാവിക വേദന സംഹാരികൾ ശരീരത്തിൽ തന്നെ ഉത്പാദിപ്പിക്കാൻ ചിരി സഹായിക്കുന്നു. ഇതിലൂടെ പിരിമുറുക്കവും വേദനയും കുറയും.