മുംബൈ: സൈനിക സേവനത്തിനിടെ വീരമൃത്യു വരിക്കുന്ന അഗ്നിവീറുകൾക്ക് കേന്ദ്രസർക്കാർ ധനസഹായം നൽകുന്നില്ലെന്ന പ്രതിപക്ഷ നേതാവ് രാഹുലിന്റെ കള്ളപ്രചരണം തള്ളി വീരമൃത്യുവരിച്ച അഗ്നിവീറിന്റെ കുടുംബം. കേന്ദ്ര സർക്കാരിൽ നിന്നും തങ്ങൾക്ക് 1.08 കോടി രൂപ ധനസഹായം ലഭിച്ചതായി വീരമൃത്യുവരിച്ച അഗ്നിവീർ അക്ഷയ് ഗവാതിന്റെ പിതാവ് ലക്ഷ്മൺ ഗവാതെ പറഞ്ഞു. 2023 ഒക്ടോബറിൽ സിയാച്ചിനിൽ വച്ചാണ് അക്ഷയ് വീരമൃത്യു വരിച്ചത്.
അക്ഷയ് വീരചരമമടഞ്ഞതിന് പിന്നാലെ കേന്ദ്ര സർക്കാരിന്റെ ധനസഹായം കുടുംബത്തിന് ലഭിച്ചിരുന്നു. 48 ലക്ഷം രൂപ ഇൻഷുറൻസ് തുക ലഭിച്ചു. ഇതിനുപുറമെ 50 ലക്ഷം രൂപ കേന്ദ്രസർക്കാരും 10 ലക്ഷം രൂപ സംസ്ഥാന സർക്കാരിന്റെ ഭാഗത്ത് നിന്നും ലഭിച്ചിരുന്നുവെന്ന് ലക്ഷ്മൺ ഗവാതെ വ്യക്തമാക്കി.
വീരമൃത്യു വരിച്ച അഗ്നിവീറുകൾക്ക് കേന്ദ്ര സർക്കാർ ധനസഹായം നൽകുന്നില്ലെന്ന കപട വാദങ്ങളായിരുന്നു ലോക്സഭയിൽ രാഹുൽ ഉന്നയിച്ചത്. എന്നാൽ വീരചരമം പ്രാപിച്ച അഗ്നിവീറുകൾക്ക് ഇതിനോടകം 1 കോടി രൂപ കേന്ദ്രസർക്കാർ ധന സഹായം നൽകിയിട്ടുണ്ടെന്ന് രാഹുലിന്റെ പ്രസംഗത്തിന് ശേഷം പ്രതിരോധ മന്ത്രി രാജ്നാഥ് സിംഗ് വ്യക്തമാക്കിയിരുന്നു.
10 വർഷത്തിന് ശേഷം പ്രതിപക്ഷ നേതാവായതിന്റെ സന്തോഷമാണ് ലോക്സഭയിൽ കള്ളപ്രചരണങ്ങൾ നടത്തി രാഹുൽ കാണിച്ചതെന്ന് ഭരണപക്ഷം പരിഹസിച്ചിരുന്നു. ഇതിന് പിന്നാലെയാണ് രാഹുലിന്റെ ആരോപണം തള്ളി മുൻ അഗ്നിവീറിന്റെ കുടുംബം രംഗത്തെത്തിയത്.