കോഴിക്കോട്: കൊയിലാണ്ടി ഗുരുദേവ കോളേജിലെ സംഘർഷവുമായി ബന്ധപ്പെട്ട് 4 എസ്എഫ്‌ഐ പ്രവർത്തകർക്ക് സസ്‌പെൻഷൻ. രണ്ടാം വർഷ വിദ്യാർത്ഥികളായ തേജു സുനിൽ, അമൽരാജ് മൂന്നാം വർഷ വിദ്യാർത്ഥികളായ തേജു ലക്ഷ്മി, അഭിഷേക് സന്തോഷ് എന്നിവരെയാണ് പ്രിൻസിപ്പൽ സസ്പെൻഡ് ചെയ്തത്. സംഘർഷത്തിന് കാരണമായ എസ്എഫ്‌ഐയുടെ ഹെൽപ്പ് ഡെസ്‌കിന്റെ ഭാഗമായി പ്രവർത്തിച്ചവരാണ് ഇവർ.
ഒന്നാം വർഷ ബിരുദ പ്രവേശനവുമായി ബന്ധപ്പെട്ട് കോളേജിൽ ഹെൽപ്പ് ഡെസ്‌ക് ഇടുന്നതിൽ തർക്കം ഉണ്ടാവുകയും എസ്എഫ്‌ഐ പ്രവർത്തകർ പ്രിൻസിപ്പാളിനെ കരണത്തടിക്കുകയും മർദ്ദിക്കുകയും ചെയ്തിരുന്നു. ഇതിന്റെ സിസിടിവി ദൃശ്യങ്ങളും പുറത്തുവന്നു. തുടർന്നാണ് വിദ്യാർത്ഥികൾക്കെതിരെ അച്ചടക്ക നടപടി സ്വീകരിച്ചത്.
പ്രിൻസിപ്പൽ സുനിൽ ഭാസ്‌കറിനെതിരെ എസ്എഫ്‌ഐ കഴിഞ്ഞ ദിവസം ഭീഷണി മുഴക്കിയിരുന്നു. അദ്ധ്യാപകൻ രണ്ട് കാലിൽ കോളേജിൽ കയറില്ലെന്നും പറയുന്നത് ചെയ്യാനുള്ള കഴിവ് എസ്എഫ്ഐക്ക് ഉണ്ടെന്നുമായിരുന്നു ഭീഷണി.
