ആലപ്പുഴ: നിയമലംഘനം നടത്തിയതിന് ശിക്ഷിക്കപ്പെട്ട യൂട്യൂബർ സഞ്ജു ടെക്കി സർക്കാർ സ്കൂളിലെ ചടങ്ങിൽ മുഖ്യാതിഥി. ആലപ്പുഴ മണ്ണഞ്ചേരി സർക്കാർ സ്കൂളിലെ കുട്ടികളുടെ മാഗസിൻ പ്രകാശനത്തിനാണ് സഞ്ജുവിനെ മുഖ്യാതിഥിയായി ക്ഷണിച്ചത്. സിപിഎം നേതാവായ ആലപ്പുഴ ജില്ലാ പഞ്ചായത്ത് അംഗമാണ് മണ്ണഞ്ചേരി സ്കൂളിലെ പരിപാടിയുടെ സംഘാടകൻ.
കാറിനുള്ളിൽ സ്വിമ്മിംഗ് പൂൾ നിർമ്മിച്ചതിന് സഞ്ജുവിന്റെ ലൈസൻസ് ആജീവനാന്തം റദ്ദാക്കിയിരുന്നു. ഇതിനിടയിലാണ് വിദ്യാർത്ഥികളുടെ പരിപാടിയിൽ സഞ്ജുവിനെ മുഖ്യാതിഥിയായി ക്ഷണിച്ചിരിക്കുന്നത്. നോട്ടീസിൽ സോഷ്യല്‍ മീഡിയ ഇന്‍ഫ്ലുവന്‍സര്‍ എന്നാണ് സഞ്ജുവിന് നൽകിയിരിക്കുന്ന വിശേഷണം.
മെയ് മാസത്തിലായിരുന്നു കാറിൽ ആവേശം സിനിമാ മോഡലിൽ സഞ്ജു സ്വിമ്മിംഗ് പൂൾ നിർമിച്ച് വീഡിയോ എടുത്തത്. ഇതിനെ തുടർന്ന് സഞ്ജുവിന്റെ ലൈസൻസ് ആജീവനാന്തം റദ്ദാക്കിയിരുന്നു. ടാറ്റ സഫാരി കാറിലാണ് സ്വിമ്മിംഗ് പൂളൊരുക്കി അമ്പലപ്പുഴയിലെ റോഡിലൂടെ സുഹൃത്തുക്കള്‍ക്കൊപ്പം യാത്ര ചെയ്തത്. തുടര്‍ന്ന് ദൃശ്യങ്ങള്‍ തന്റെ യൂട്യൂബ് ചാനലിലൂടെ പങ്കുവച്ചതോടെയാണ് മോട്ടോര്‍ വാഹന വകുപ്പ് സഞ്ജുവിനെതിരെ നടപടി സ്വീകരിച്ചത്. സ്വിമ്മിംഗ് പൂൾ ഒരുക്കിയ കാര്‍ പിടിച്ചെടുത്ത എംവിഡി കാറിന്റെ രജിസ്ട്രേഷനും റദ്ദാക്കിയിരുന്നു.
