പെൺമക്കളെ കുറിച്ച് വികാരനിർഭരമായ പോസ്റ്റ് പങ്കുവച്ച് നടനും രാഷ്‌ട്രീയ പ്രവർത്തകനുമായ കൃഷ്ണ കുമാർ. ഓരോരുത്തർക്കുമൊപ്പം നിൽക്കുന്ന ചിത്രം പങ്കുവെച്ച് പ്രത്യേകം പോസ്റ്റുകളിലായിട്ടാണ് മക്കളെക്കുറിച്ചുളള കാര്യങ്ങൾ കൃഷ്ണകുമാർ പങ്കുവെയ്‌ക്കുന്നത്. മകൾ ദിയാ കൃഷ്ണ, ഇഷാനി കൃഷ്ണ, ഹൻസിക കൃഷ്ണ എന്നിവരോടൊപ്പമുള്ള ചിത്രങ്ങളാണ് കൃഷ്ണ കുമാർ പങ്കുവച്ചത്.
മക്കളോടൊപ്പം സന്തോഷത്തോടെ ജീവിതം ആസ്വദിക്കാൻ അവസരം നൽകിയതിന് ദൈവത്തിന് നന്ദിയെന്ന് കുറിച്ചുകൊണ്ടാണ് ദിയാ കൃഷ്ണയോടൊപ്പമുള്ള ചിത്രം പങ്കുവച്ചത്. പിന്നാലെ ഏറ്റവും ഇളയ മകളായ ഹൻസികയെ കുറിച്ചാണ് കൃഷ്ണ കുമാർ നീണ്ട കുറിപ്പ് എഴുതിയത്.
“വീട്ടിലെ ഏറ്റവും ഇളയ അംഗം. ഞങ്ങൾ തമ്മിൽ 37 വയസ് വ്യത്യാസം. പക്ഷേ, പലപ്പോഴും തോന്നാറുണ്ട് അവളുടെ ആത്മാവ് എന്നേക്കാൾ ഈ ഭൂമിയിൽ സഞ്ചരിച്ചത് പോലെ. അനുഭവങ്ങൾ ഉള്ളതുപോലെ. പക്വത അധികമുള്ള ഒരാളെ പോലെ. കുടുംബത്തിലെ ആറ് പേരിൽ ഏറ്റവും അധികം ക്ഷമയുള്ള ആൾ. അവളിൽ നിന്നും പലതും ചോദിച്ച് മനസിലാക്കാറുണ്ട്, പഠിക്കാറുണ്ട്. ഒരു പിതാവെന്ന നിലയിൽ ഇതൊക്കെ ജീവിതത്തിലെ വലിയ വിജയങ്ങളായി തോന്നാറുണ്ട്- എന്ന് അദ്ദേഹം കുറിച്ചു
അതിന് പിന്നാലെ മൂന്നാമത്തെ മകൾ ഇഷാനിയെ കുറിച്ചായിരുന്നു കൃഷ്ണകുമാറിന്റെ കുറിപ്പ്. “എല്ലാ വീടുകളിലും ഒരേ മാതാപിതാക്കൾക്ക് ജനിക്കുന്ന മക്കൾ തികച്ചും വ്യത്യസ്തരായി കാണാറുണ്ട്. ഇവിടെയും അങ്ങനെ തന്നെ. നാല് മക്കളിൽ വ്യക്തതയും, ചിട്ടയും ഏറ്റവും കൂടുതലുള്ളവൾ. വിശ്വാസ്യതയുടെ പര്യായം. ഒരു കാര്യം ഏൽപ്പിച്ചാൽ അത് കൃത്യമായി ചെയ്തിരിക്കും. ഇതുവരെ കള്ളം പറഞ്ഞ് കണ്ടിട്ടില്ല. പക്ഷേ എല്ലാം സാവധാനം ചെയ്യാൻ ആഗ്രഹിക്കുന്ന ഒരാൾ. യാത്രകളിൽ ഹോട്ടലിൽ കയറിയാൽ നമ്മൾ കഴിച്ച് കഴിഞ്ഞാലും അവൾക്കായി കാത്തുനിൽക്കണം. മറ്റ് മക്കളേ പോലെ സുന്ദരിയായ ഇഷ്നിയെയും എനിക്ക് ഒരുപാടിഷ്ടം.എല്ലാവർക്കും നന്മകൾ നേരുന്നു- എന്ന് കൃഷ്ണ കുമാർ കുറിച്ചു.
ദിയാ കൃഷണയും ഇഷാനിയും ഹൻസികയും സമൂഹമാദ്ധ്യമ ലോകത്ത് നിറസാന്നിധ്യമാണ്. മൂവരുടെയും ചിത്രങ്ങളും വീഡിയോകളും സമൂഹമാദ്ധ്യമങ്ങളിൽ ഏറെ ശ്രദ്ധ നേടാറുണ്ട്. വീട്ടുവിശേഷങ്ങളും മറ്റും ഉൾപ്പെടുത്തിയുള്ള ഇവരുടെ വീഡിയോയ്‌ക്ക് ആരാധകരും ഏറെയാണ്.
