പാലക്കാട് : മലപ്പുറത്ത് കാറിൽ കുഴൽപ്പണം കടത്തിയ യുവാവ് അറസ്റ്റിൽ. മലപ്പുറം താനൂർ പനക്കാട്ടൂർ സ്വദേശി എസ്. മുഹമ്മദ് ഹാഷിമിനെയാണ്‌ (31) രേഖകളില്ലാത്ത 20.04 ലക്ഷം രൂപയുമായി കൊഴിഞ്ഞാമ്പാറ പോലീസ് അറസ്റ്റുചെയ്തത്‌. സംശയം തോന്നാതിരിക്കാൻ ഭാര്യയും മൂന്ന് ചെറിയ കുട്ടികളെയും കൂട്ടിയുള്ള യാത്രയിലാണ് മുഹമ്മദ് ഹാഷിം പണം കടത്തിയത് .
പോലീസിന് ലഭിച്ച രഹസ്യ വിവരത്തെത്തുടർന്ന് ബുധനാഴ്ചരാത്രി എട്ടുമണിയോടെ മേനോൻപാറയിൽ നടത്തിയ വാഹനപരിശോധനയ്‌ക്കിടെ കൈകാണിച്ചെങ്കിലും കാർ നിർത്താതെപോയി. ഇതോടെ വിവരം ചിറ്റൂർ പോലീസിന് കൈമാറി.തുടർന്ന്, ചിറ്റൂർ പോലീസിന്റെ സഹായത്തോടെ കാർ പിടികൂടി. തുടർന്നു നടത്തിയ പരിശോധനയിൽ കാറിന്റെ രഹസ്യ അറയിൽ സൂക്ഷിച്ച 20.4 ലക്ഷംരൂപ കണ്ടെത്തി. കോടതിയിൽ ഹാജരാക്കിയ ഹാഷിമിനെ റിമാൻഡ് ചെയ്തു.
