വയനാട് : അഞ്ച് ലക്ഷം രൂപയുടെ മയക്കുമരുന്നുമായി ആയുർവേദ ഡോക്ടർ അറസ്റ്റിൽ. കൊല്ലം കരുനാഗപ്പള്ളി സ്വദേശി ഇടമരത്തു വീട്ടിൽ അൻവർഷായാണ് പിടിയിലായത്. മുത്തങ്ങ എക്സൈസ് ചെക്ക് പോസ്റ്റിൽ വാഹന പരിശോധനക്കിടെയാണ് 160.77 ഗ്രാം മെത്താഫിറ്റമിനുമായി അൻവർഷാ പിടിയിലായത്.
20 വർഷം വരെ കഠിന തടവ് ശിക്ഷ ലഭിച്ചേക്കാവുന്ന കുറ്റമാണിത് . എക്സൈസ് ഇൻസ്പെക്ടർ കെ.വി നിധിനും സംഘവും നടത്തിയ വാഹന പരിശോധനയിലാണ് മൈസൂർ – പൊന്നാനി കെ.എസ്.ആർ.ടി.സി ബസ്സിലെ യാത്രക്കാരനായ അൻവർഷായിൽ നിന്ന് ലഹരി മരുന്ന് പിടികൂടിയത്.
ദുബായിൽ സ്വന്തമായി ആയുർവേദ സെന്റർ നടത്തുന്ന ഡോക്ടർ ആണ് അൻവർഷാ. വിവാഹ ആവശ്യത്തിനായി കഴിഞ്ഞ 5 മാസമായി ഇയാൾ നാട്ടിൽ ഉണ്ടായിരുന്നു . ഇതിനിടെ ഇയാൾ ബാംഗ്ലൂരിൽ നിന്ന് മയക്കുമരുന്ന് വാങ്ങി കൊച്ചിയിലേക്ക് ചില്ലറവിൽപ്പനക്കായി കൊണ്ടു പോവുകയായിരുന്നു .
