ധർമ്മശാല: ഹിമാചലിലെ കുളു ജില്ലയിലെ തോഷ് നല്ല മേഖലയിൽ മേഘവിസ്ഫോടനത്തെ തുടർന്ന് മിന്നൽ പ്രളയം. ഇന്ന് പുലർച്ചെയോടെയാണ് മണികരനിലെ തോഷ് മേഖലയിൽ പ്രളയം ഉണ്ടായത്. അപകടത്തെ തുടർന്ന്, നടപ്പാലവും മദ്യശാലയും ഉൾപ്പെടെ മൂന്ന് താത്കതാലിക ഷെഡുകളാണ് ഒലിച്ചുപോയത്.
പ്രളയത്തിൽ ആളപായമൊന്നും റിപ്പോർട്ട് ചെയ്തിട്ടില്ലെന്നും സ്ഥതിഗതികൾ വിലയിരുത്തകയാണെന്നും കുളു ടോറുൾ ഡെപ്യൂട്ടി കമ്മീഷണർ എസ് രവീഷ് പറഞ്ഞു. നദിക്കരയിലുള്ള ജനങ്ങൾ എത്രയും വേഗം മാറണമെന്നും അദ്ദേഹം മുന്നറിയിപ്പ് നൽകി. മഴക്കാലത്ത് നിർമാണ പ്രവർത്തനങ്ങൾ നിരോധിക്കുമെന്നും മാനദണ്ഡങ്ങൾ ലംഘിക്കുന്നവർക്കെതിരെ കർശന നടപടി സ്വീകരിക്കുമെന്നും രവീഷ് കൂട്ടിച്ചേർത്തു.
ഹിമാചൽ പ്രദേശിൽ അതിശക്തമായ മഴയാണ് നിലനിൽക്കുന്നത്. ഏഴ് ജില്ലകൾക്ക് ഇന്ന് ഓറഞ്ച് അലർട്ടാണ് പ്രഖ്യാപിച്ചിരിക്കുന്നത്. സംസ്ഥാനത്ത് അടുത്ത അഞ്ച് ദിവസത്തിനുള്ളിൽ ശക്തമായ മഴയ്ക്ക് സാധ്യതയുണ്ടെന്നും കാലാവസ്ഥാ വകുപ്പ് മുന്നറിയിപ്പ് നൽകി.
