മിസോറാമിൽ പുതിയ ഇനം പാമ്പിനെ കണ്ടെത്തി ഗവേഷകർ. പ്രൊഫ.എച്ച്.ടി. ലാൽറെംസംഗയും മിസോറം സർവ്വകലാശാലയിലെ സുവോളജി വിഭാഗത്തിലെ അസി.പ്രൊഫസർ ഡോ.എം.വബേരിയൂരിലൈയും ഇന്ത്യയിലെയും ജർമ്മനിയിലെ മാക്സ് പ്ലാങ്ക് ഇൻസ്റ്റിറ്റ്യൂട്ടിലെയും സഹപ്രവർത്തകരും ചേർന്നാണ് പുതിയ ഇനം പാമ്പിനെ കണ്ടെത്തിയിരിക്കുന്നത്. ഇവയ്‌ക്ക് “സ്മിത്തോഫിസ് മിസോറാമെൻസിസ്” എന്ന് നാമകരണം ചെയ്യുകയും ചെയ്തു.
സംസ്ഥാനത്തിന്റെ പേര് കൂടി ചേർത്താണ് പാമ്പിന് പേര് നൽകിയിരിക്കുന്നത്. പുതിയ ഇനം പാമ്പുകൾക്ക് ‘മിസോ’ എന്ന പേരുകൂടി നൽകിയിരിക്കുന്നു. “തുയ്തിയാംഗ്രൂൾ” അല്ലെങ്കിൽ “മിസോ ബ്രൂക്ക് സ്നേക്ക്” എന്നാണ് ഇതിനെ വിളിക്കുന്നത്. 700 മീറ്ററിനു മുകളിൽ ഉയരത്തിലുള്ള നിർമ്മലമായ കുന്നിൻ അരുവികൾക്ക് സമീപം താമസിക്കുന്ന നദീതീരത്തെ ആവാസ വ്യവസ്ഥയിലാണ് പുതുതായി തിരിച്ചറിഞ്ഞ പാമ്പിനെ കണ്ടെത്തിയത്.
വടക്ക് കിഴക്കൻ ഇന്ത്യയിൽ നിന്നും പടിഞ്ഞാറൻ ചൈനയിൽ നിന്നും ഇതിനു മുൻപ് സ്മിത്തോഫിസ് ജനുസ്സിലെ നാല് ഇനങ്ങളെ കണ്ടെത്തിയിട്ടുണ്ട്. ഇവയിൽ രണ്ടെണ്ണം, സ്മിത്തോഫിസ് അറ്റമ്പോറലിസ് (2019-ൽ), സ്മിത്തോഫിസ് ബൈകളർ എന്നിവ മിസോറാമിൽ നിന്നു തന്നെയാണ് കണ്ടെത്തിയത്. പുതിയ ഇനം കൂടി വന്നതോടെ ലോകമെമ്പാടും അഞ്ച് ഇനങ്ങളെ കണ്ടെത്തി കഴിഞ്ഞു.
മിസോറാമിലെ താഴ്ന്ന പ്രദേശങ്ങളിലും ഉയർന്ന പ്രദേശങ്ങളിലും നദികൾക്കും ചുറ്റുമുള്ള പ്രദേശങ്ങളിലും കാണപ്പെടുന്ന പുതിയ ഇനം പാമ്പുകളെ മറ്റുള്ളവയിൽ നിന്നും വേർതിരിച്ചറിയാൻ പ്രയാസമാണ്. ഇവയുടെ കുടുംബത്തിൽപ്പെട്ട മറ്റ് പാമ്പുകളിൽ നിന്നും ഡിഎൻഎയിൽ 10 മുതൽ 14 ശതമാനം വരെ (10%-14%) വ്യത്യാസമുണ്ട്. കൂടാതെ അവരുടെ നിറത്തിലും നീളത്തിലും വ്യത്യാസമുണ്ട്.
